ডিজিটেল ডেস্ক: ইৰাণত অব্যাহত আছে হিজাব বিৰোধী প্ৰতিবাদ। শাসক পক্ষৰ বাবে চৰম অস্বস্তিৰ কাৰণ হৈ পৰা এই হিজাব বিৰোধী প্ৰতিবাদ দমন কৰিবলৈ এটাৰ পিছত আন এটা কঠোৰ সিদ্ধান্ত গ্ৰহণ কৰিছে ইৰাণ চৰকাৰে।
মহছা আমিনীৰ মৃত্যুৰ পাছৰে পৰা আৰম্ভ হোৱা এই প্ৰতিবাদে এতিয়া ব্যাপক গণ আন্দোলনৰ ৰূপ ধাৰণ কৰিছে৷ সৰ্বত্ৰ বিয়পিছে হিজাব বিৰোধী আন্দোলনৰ জুই৷
এনে পৰিপ্ৰেক্ষিতত এই আন্দোলনক দমন কৰিব বিচাৰি আছে ইৰাণ চৰকাৰে। ইয়াৰ মাজতে ইৰাণৰ এখন আদালতে চৰকাৰৰ বিৰুদ্ধে প্ৰতিবাদ কৰা আৰু তিনিগৰাকী প্ৰতিবাদকাৰীক মৃত্যুদণ্ডৰ শাস্তি প্ৰদান কৰিছে।
এই তিনিওগৰাকী প্ৰতিবাদকাৰীৰ বিৰুদ্ধে ‘ঈশ্বৰৰ বিৰুদ্ধে যুদ্ধ ঘোষণা’ৰ অভিযোগ উত্থাপিত হৈছে৷ প্ৰতিবাদকাৰীৰ বিৰুদ্ধেই কঠোৰতম ব্যৱস্থা গ্ৰহণ কৰা বিষয়টোৱে এতিয়া আন্তঃৰাষ্ট্ৰীয় পৰ্যায়তো লাভ কৰিছে ব্যাপক চৰ্চা।
অলপতে দুগৰাকী প্ৰতিবাদকাৰীক ফাঁচী প্ৰদান কৰা হৈছিল। এই দুয়োজনৰ বিৰুদ্ধে নিৰাপত্তাৰক্ষীক হত্যা কৰাৰ অভিযোগ আছিল। এই দুজনৰ ভিতৰত এজন কাৰাটে চেম্পিয়ন আছিল।
শেহতীয়া খবৰ অনুসৰি মৃত্যুদণ্ডৰ শাস্তি লাভ কৰা প্ৰতিবাদকাৰী তিনিজন হ’ল ছালেহ মিৰহাছমী, মজিদ কাজেমী আৰু ছাইদ ইয়াঘৌবী। ইছফাহান চহৰত চৰকাৰ বিৰোধী প্ৰতিবাদৰ সময়ত চৰকাৰ সমৰ্থক মিলিচীয়াক হত্যা কৰাৰ অভিযোগত তিনিওজনকে দোষী সাব্যস্ত কৰা হৈছে।
Continue Reading
