ইজৰাইলৰ সৈতে চুক্তি অনুসৰি ভাৰতে ক্ৰয় কৰিছিল পেগাচাছ: উচ্চতম ন্যায়ালয়ত দাখিল আৱেদন

ডিজিটেল ডেস্ক: ইজৰাইলৰ স্পাইৱেৰ ‘পেগাচাছ’ৰ ব্যৱহাৰৰ সন্দৰ্ভত উচ্চতম ন্যায়ালয়ত এক নতুন আৱেদন দাখিল কৰা হৈছে৷ ২০১৭ চনত ইজৰাইলৰ সৈতে ২ বিলিয়ন আমেৰিকান ডলাৰৰ প্ৰতিৰক্ষা চুক্তিৰ অংশ হিচাপে ভাৰতে ‘পেগাচাছ’ স্পাইৱেৰ ক্ৰয় কৰিছিল বুলি দাবী কৰা সংবাদ মাধ্যমৰ প্ৰতিবেদনে ইতিমধ্যে দেশজুৰি চাঞ্চল্যৰ সৃষ্টি কৰিছে৷ উচ্চতম ন্যায়ালয়ৰ সন্মুখত গোচৰটোৰ মূল আৱেদনকাৰীসকলৰ মাজৰ অন্যতম অধিবক্তা এম এল শৰ্মাই দাখিল কৰা আৱেদনত উল্লেখ কৰা হৈছে যে চুক্তিখন সংসদৰ দ্বাৰা অনুমোদিত নহয়৷ তেওঁ উচ্চতম ন্যায়ালয়ত এটা অপৰাধমূলক গোচৰ ৰুজু কৰাৰ বাবে উপযুক্ত নিৰ্দেশনা জাৰি কৰিবলৈ আৰু পেগাচাছ স্পাইৱেৰ ক্ৰয় চুক্তি আৰু ন্যায়ৰ স্বাৰ্থত ৰাজহুৱা পুঁজিৰ অপব্যৱহাৰৰ অভিযোগৰ তদন্ত কৰিবলৈ আহ্বান জনাইছে৷ সংবাদ মাধ্যমৰ প্ৰতিবেদনত কোৱা হৈছে যে ‘পেগাচাছ’ আৰু এটা মিছাইল প্ৰণালী ২০১৭ চনত ভাৰত আৰু ইজৰাইলৰ মাজত প্ৰায় ২ বিলিয়ন আমেৰিকান ডলাৰৰ অত্যাধুনিক অস্ত্ৰ আৰু চোৰাংচোৱা সঁজুলিৰ কেন্দ্ৰবিন্দু আছিল। যোৱা বছৰৰ ২৭ অক্টোবৰত উচ্চতম ন্যায়ালয়ে ভাৰতৰ কিছুমান লোকৰ নিৰীক্ষণৰ বাবে পেগাচাছৰ ব্যৱহাৰৰ তদন্তৰ বাবে চাইবাৰ বিশেষজ্ঞৰ এটা তিনিজনীয়া পেনেল নিযুক্ত কৰিছিল৷ নাগৰিকসকলৰ গোপনীয়তাৰ অধিকাৰৰ বিষয়টোক লৈ সাম্প্ৰতিক সময়ৰ এক গুৰুত্বপূৰ্ণ ৰায়ত মুখ্য ন্যায়াধীশ এন ভি ৰামানাৰ নেতৃত্বত এখন বিচাৰপীঠে কৈছিল যে ৰাজ্যৰ দ্বাৰা কেৱল ৰাষ্ট্ৰীয় নিৰাপত্তা ৰক্ষাৰ আহ্বানে ন্যায়পালিকাক মূক দৰ্শক কৰি তুলিব নোৱাৰে আৰু ৰামানাই দৃঢ়তাৰে কয় যে গণতান্ত্ৰিক দেশ এখনত ব্যক্তিৰ ওপৰত গুপ্তচৰ বৃত্তিৰ অনুমতি দিব নোৱাৰি। উচ্চতম ন্যায়ালয়ে কয় যে ন্যায়াধীশ ৰবীন্দ্ৰনে চাইবাৰ নিৰাপত্তা, ডিজিটেল ফৰেনচিক, নেটৱৰ্ক আৰু হাৰ্ডৱেৰৰ তিনিজনীয়া পেনেলৰ কাম-কাজ তদাৰক কৰিব। উচ্চতম ন্যায়ালয়ে লগতে কয় যে, তেওঁলোকে ছটা আকৰ্ষণীয় পৰিস্থিতিৰ প্ৰতি লক্ষ্য ৰাখি সমিতিখন প্ৰস্তুত কৰিছে৷ ব্যক্তিৰ গোপনীয়তাৰ অধিকাৰ আৰু বাক স্বাধীনতা প্ৰভাৱিত হোৱাৰ যি অভিযোগ, তাক পৰীক্ষা কৰা প্ৰয়োজন বুলি উচ্চতম ন্যায়ালয়ে মন্তব্য কৰে৷