ইজিপ্তত বিপদত পৰা ভাৰতীয় মহিলাক বচালে শ্বাহৰুখ খানৰ নামে! কেনেকৈ?

ডিজিটেল ডেস্কঃ বলীউডৰ কিং খান শ্বাহৰুখ খান কিমান জনপ্ৰিয় সেয়া নতুনকৈ কোৱাৰ প্ৰয়োজন নাই। শ্বাহৰুখৰ জনপ্ৰিয়তা কেৱল দেশতে সীমাবদ্ধ নহয়। দেশ-বিদেশৰ পৰিধি ভাঙি বিয়পি আছে কিং খানৰ জনপ্ৰিয়তা। শ্বাহৰুখ খানৰ চিনেমাসমূহ ভাৰত, ইউৰোপ, উপসাগৰীয় আৰু মধ্য প্ৰাচ্যৰ দেশসমূহতো বহুলভাৱে চোৱা হয়। উপসাগৰীয় আৰু মধ্য প্ৰাচ্যৰ দেশসমূহত বলীউড বাদশ্বাহ শ্বাহৰুখৰ বহু অনুৰাগী আছে। শেহতীয়াকৈ পুনৰ প্ৰমাণ পোৱা গ'ল বাহিৰৰ দেশত শ্বাহৰুখ খান কিমান জনপ্ৰিয়। বিপদত পৰা এগৰাকী ভাৰতীয় মহিলাক ৰক্ষা কৰিলে শ্বাহৰুখ খানৰ নামটোৱে।

অশোক বিশ্ববিদ্যালয়ৰ অৰ্থনীতিৰ অধ্যাপক অশ্বিনী দেশপাণ্ডেই টুইটাৰত টুইট কৰি লিখিছে যে তেওঁক ইজিপ্তত শ্বাহৰুখৰ নামটোৱে বৰ ডাঙৰ সহায় কৰিছিল। ইজিপ্তৰ এজন ট্ৰেভেল এজেণ্টে মহিলাগৰাকী বলীউড বাদশ্বাহ শ্বাহৰুখৰ দেশৰ পৰা অহা বুলি জানি তেওঁক সহায় কৰিছিল। ইজিপ্ত ভ্ৰমণ কৰিবৰ বাবে এগৰাকী ট্ৰেভেল এজেণ্টক দিবলগীয়া পইচা ট্ৰেন্সফাৰ কৰাত অসুবিধা পাইছিল মহিলাগৰাকীয়ে। ট্ৰেভেল এজেণ্টেগৰাকীয়ে মহিলাগৰাকীক কৈছিল ''আপুনি শ্বাহৰুখ খানৰ দেশৰ পৰা আহিছে। মই আপোনাক বিশ্বাস কৰিছোঁ।মই আপোনাৰ নামত সকলো বুকিং কৰি দিম, চিন্তা নকৰিব। আপুনি মোক পাছত টকা পৰিশোধ কৰিলেও হ'ব। এনেকুৱা কাম মই আগতে কাৰো লগত কৰা নাই। কিন্তু আপোনাক কৰিছো কেৱলমাত্ৰ আপুনি শ্বাহৰুখ খান বাস কৰা একেখন দেশৰ মানুহ কাৰণে। মই শ্বাহৰুখ খানক বৰ ভালপাওঁ।''

অশ্বিনী দেশপাণ্ডেৰ এই টুইটটোত বহু লোকে মন্তব্য কৰিছিল যে বাহিৰৰ দেশত বহুতেই কিং খানৰ বিষয়ে বহুত ভালদৰে কয়। ভাৰতৰ পৰা অহা বুলি ক'লে তেওঁলোকে বহু উৎসাহিতবোধ কৰে। এজনে কৈছিল মই ফ্ৰান্সলৈ যাওঁতে বহু লোকেই কৈছিল ভাৰত বুলি ক'লে আমি কেৱল শ্বাহৰুখ খানকে জানোঁ। অশ্বিনী দেশপাণ্ডেৰ টুইটটোত সকলোৱে শ্বাহৰুখৰ জনপ্ৰিয়তা এনেদৰে অটুট থকাটো কামনা কৰিছে। একাংশই কৈছে শ্বাহৰুখ খান সঁচাকৈয়ে বলীউড কিং।

আৰু পঢ়কঃ বৰ জীয়ৰীয়ে পালে নতুন চাকৰি; মন্দিৰলৈ গৈ পথ দুৰ্ঘটনাত নিঃশেষ হ’ল এটা পৰিয়াল