ডিজিটেল ডেস্কঃ অৱশেষত পাকিস্তানৰ প্ৰাক্তন প্ৰধানমন্ত্ৰী ইমৰান খানক সাময়িক সকাহ দিলে আদালতে। বেলুচিস্তান উচ্চ ন্যায়ালয়ে প্ৰাক্তন প্ৰধানমন্ত্ৰী আৰু পাকিস্তান তেহৰিক-ই-ইনচাফ (পিটিআই) দলৰ মুৰব্বী ইমৰান খানৰ বিৰুদ্ধে জাৰি কৰা জামিন অযোগ্য গ্ৰেপ্তাৰ পৰোৱানা স্থগিত ৰাখিছে। পাকিস্তানৰ প্ৰাক্তন প্ৰধানমন্ত্ৰী জনে দিয়া উচটনিমূলক ভাষণৰ ক্ষেত্ৰত অস্থায়ী সকাহ প্ৰদান কৰে।
সাংবিধানিক পদত অধিষ্ঠিত ব্যক্তিসকলৰ বিৰুদ্ধে ঘৃণামূলক ভাষণ দিয়াৰ অভিযোগত বৃহস্পতিবাৰে কোৱেটা চহৰৰ এগৰাকী ন্যায়াধীশে ইমৰানৰ বিৰুদ্ধে ৱাৰেণ্ট জাৰি কৰিছিল। তেওঁ ইমৰানক গ্ৰেপ্তাৰ কৰাৰ নিৰ্দেশ দিছিল। ইমৰানে উচ্চ ন্যায়ালয়ত উক্ত আদেশৰ বিৰুদ্ধে আবেদন কৰিছিল। উচ্চ ন্যায়ালয়ে আৱেদনখন মঞ্জুৰ কৰি গ্ৰেপ্তাৰী পৰোৱানাত স্থগিতাদেশ জাৰি কৰে। উল্লেখ্য পাকিস্তানৰ প্ৰাক্তন প্ৰধানমন্ত্ৰী ইমৰান খানৰ ওপৰত আহি পৰিছে প্ৰচণ্ড চাপ।
কিছুদিন আগতে আৰক্ষীয়ে খানক গ্ৰেপ্তাৰ কৰিবলৈ লাহোৰত উপস্থিত হৈছিল৷ ইছলামাবাদৰ পৰা যোৱা আৰক্ষীৰ বিশাল দলে লাহোৰত থকা ইমৰানৰ ঘৰত উপস্থিত হোৱাৰ পিছতে পিটিআইৰ সমৰ্থকসকলে আৰক্ষীক বাধা দিছিল৷ পাকিস্তানৰ প্ৰাক্তন প্ৰধানমন্ত্ৰীগৰাকীৰ বিৰুদ্ধে গ্ৰেপ্তাৰ পৰোৱানা লৈ উপস্থিত হোৱা বৃহৎ আৰক্ষী বাহিনীৰ সৈতে পিটিআইৰ সমৰ্থকসকলে তৰ্কত লিপ্ত হোৱা দেখা গৈছিল৷উল্লেখ্য ইমৰান খানে প্ৰধানমন্ত্ৰী হৈ থকাৰ সময়ত বিদেশৰ পৰা লাভ কৰা বহু উপহাৰ বিক্ৰী কৰাৰ গোচৰৰ শুনানি চলি আছে। পাকিস্তানৰ আইন অনুসৰি তেনে উপহাৰ নিজৰ ইচ্ছানুসৰি কোনেও বিক্ৰী কৰিব নোৱাৰে৷ পাকিস্তানৰ প্ৰাক্তন প্ৰধানমন্ত্ৰী খানে শুনানিত ব্যক্তিগতভাৱে উপস্থিত হোৱা নাছিল।
Continue Reading
