ডিজিটেল ডেস্কঃ জুলাই মাহত ৱেষ্ট ইণ্ডিজ ভ্ৰমণলৈ যাব টিম ইণ্ডিয়া। এই ৰাউণ্ডত ভাৰতীয় দলে তিনিওটা ফৰ্মেটতে ক্ৰশৃংখলা খেলিব। বি চি চি আইয়ে টেষ্ট আৰু এদিনীয়া দল ঘোষণা কৰাৰ বিপৰীতে ৩ আগষ্টৰ পৰা অনুষ্ঠিত হ’বলগীয়া টি-২০ শৃংখলাৰ বাবে দল এতিয়াও ঘোষণা কৰা হোৱা নাই। কেকেআৰৰ তাৰকা বেটছমেন ৰিংকু সিঙক টি-২০ দলত সুযোগ দিয়াৰ সম্ভাৱনা আছে। একে সময়তে মহম্মদ ছামিও দললৈ ঘূৰি আহিব পাৰে।
ভাৰতীয় দলৰ ছিনিয়ৰ বেগী বলাৰ মহম্মদ ছামিক টেষ্ট আৰু এদিনীয়া দলত অন্তৰ্ভুক্ত কৰা হোৱা নাই যদিও টি-২০ শৃংখলাৰ বাবে দলত অন্তৰ্ভুক্ত হ’ব পাৰে। আনহাতে, আই পি এলত দুৰ্দান্ত বেটছমেন ৰিংকু সিঙক টি-২০ ছিৰিজৰ জৰিয়তে প্ৰথমবাৰৰ বাবে ভাৰতীয় দলৰ সৈতে জড়িত হ’ব পাৰে। টিম ইণ্ডিয়াই ৱেষ্ট ইণ্ডিজৰ বিৰুদ্ধে ৫ খন টি-২০ আই মেচ ধাৰাবাহিকভাৱে খেলিব।
ভাৰতীয় দলটোৱে দীৰ্ঘদিন ধৰি টি-২০ ক্ৰিকেটত ফিনিছাৰ বিচাৰি আছিল, যাৰ বাবে উইকেট ৰক্ষক বেটছমেন দীনেশ কাৰ্তিকক বহু সুযোগ দিয়া হৈছিল যদিও সুযোগৰ সঠিক ব্যৱহাৰ দীনেশে কৰিব নোৱাৰিলে। ইয়াৰ বাবেই ৰিংকু সিঙক ভাৰতীয় দলৰ সৈতে সংযোগ কৰাৰ সম্ভাৱনা আছে। ২০২৩ চনৰ আই পি এলত ৰিংকুৱে সুন্দৰ প্ৰদৰ্শনেৰে সকলোৰে দৃষ্টি আকৰ্ষণ কৰিছিল। আইপিএল ২০২৩ত ৰিংকুৱে ১৪খন মেচত গড়ে ৫৯.২৫ আৰু ১৪৯.৫৩ ষ্ট্ৰাইক ৰেটত ৪৭৪ ৰান সংগ্ৰহ কৰে।
Continue Reading
