ইংলেণ্ডৰ বিৰুদ্ধে চেমিফাইনেলত বিৰাট কোহলীক নেখেলিবলৈ উপদেশ দিলে কেভিন পিটাৰছনে

ডিজিটেল ডেস্কঃ দয়া কৰি বৃহস্পতিবাৰে ছুটি লওক কোহলীয়ে৷ ইংলেণ্ডৰ বিৰুদ্ধে কাইলৈ হ’বলগা টি২০ বিশ্বকাপৰ দ্বিতীয়খন চেমিফাইনেলৰ প্ৰাকমুহূৰ্তত বিৰাট কোহলীক উদ্দেশ্যি এইদৰে অনুৰোধ কৰিলে কেভিন পিটাৰছনে৷

ইংলেণ্ডৰ বিৰুদ্ধে নমাৰ পূৰ্বে কঠিন অনুশীলনত ব্যস্ত আছে কোহলী৷ ইনষ্টাগ্ৰামত অনুশীলনকালৰ এটা ভিডিঅ’ও তেওঁ শ্বেয়াৰ কৰিছে৷ অনুশীলনকালছোৱাক উপভোগ কৰা বুলি কোহলীয়ে ভিডিঅ’টোৰ কেপচন হিচাপে লিখিছে৷

ভিডিঅ’টোৰ কমেণ্ট হিচাপে ইংলেণ্ডৰ অন্যতম শ্ৰেষ্ঠ বেটাৰ পিটাৰছনে এটা আমোদজনক মন্তব্য কৰিছে৷ তেওঁ লিখে- ‘‘দয়া কৰি বৃহস্পতিবাৰে তুমি ছুটি লোৱা৷ তুমিতো জানা যে মই তোমাক খুব ভালপাওঁ৷ সেয়ে কওঁ, বৃহস্পতিবাৰে তুমি আৰাম কৰা’’৷

বিৰাট কোহলীয়ে অৱশ্যে পিটাৰছনৰ এই কমেণ্টটোৰ কোনো উত্তৰ দিয়া নাই৷

উল্লেখ্য যে চলিত বিশ্বকাপত সৰ্বোচ্চ ৰাণ সংগ্ৰহৰ তালিকাত শীৰ্ষত আছে বিৰাট কোহলী৷ ইতিমধ্যে বিশ্বকাপত তিনিটাকৈ হাফ চেঞ্চুৰি অৰ্জন কৰিছে কোহলীয়ে৷

সেয়ে কাইলৈ হ’বলগা চেমিফাইনেলখনত কোহলীয়ে কেনেধৰণৰ বেটিং বিক্ৰম প্ৰদৰ্শন কৰে, তাৰ প্ৰতি ক্ৰিকেটানুৰাগীসকলৰ মাজত ব্যাপক চৰ্চাৰ সৃষ্টি হৈছে৷