ডিজিটেল ডেস্ক: শেহতীয়াকৈ অসমত অসম চৰকাৰে গ্ৰহণ কৰা দুটা সিদ্ধান্তই ৰাজ্যত প্ৰতিক্ৰিয়াৰ সৃষ্টি কৰিছে৷ প্ৰথমটো আছিল অসম চৰকাৰৰ কেবিনেটে অসম লোকসেৱা আয়োগৰ মূল পৰীক্ষাৰ পৰা বাধ্যতামূলক অসমীয়া ভাষাৰ প্ৰশ্নকাকত বাদ দিয়া প্ৰসংগ৷ আৰু, দ্বিতীয়টো হ’ল প্ৰতিটো সমষ্টিতে একোখনকৈ CBSEৰ অধীনত ইংৰাজী মাধ্যমৰ বিদ্যালয় স্থাপনৰ সিদ্ধান্ত৷ এই দুটা সিদ্ধান্তই অসমীয়া ভাষা আৰু অসমীয়া মাধ্যমৰ প্ৰতি বিপদ ঘনীভূত কৰিব বুলি ৰাজ্যৰ বিদ্বৎ মহলে আশংকা প্ৰকাশ কৰিছে৷ এনে সময়তে অসমীয়া ভাষালৈ আহিছে এক সুখবৰ কঢ়িয়াই আনিছে এটা অনলাইন প্ৰতিষ্ঠান ডেইলীহাণ্ট-এ৷
ডেইলীহাণ্ট হৈছে বাংগালুৰুস্থিত ভাৰতীয় সমল আৰু নিউজ এপ, যিয়ে একাধিক সমল প্ৰদানকাৰীৰ পৰা ১৪টা ভাৰতীয় ভাষাত স্থানীয় ভাষাৰ সমল প্ৰদান কৰে৷ শেহতীয়াকৈ, ডেইলীহাণ্ট-এ তেওঁলোকৰ এপত ১৫ সংখ্যক ভাষা হিচাপে অসমীয়া ভাষাক সংলগ্ন কৰিছে৷ দেশৰ নেইটিজেনৰ মাজত ব্যৱধান দূৰ কৰাৰ উদ্দেশ্যৰে এপটোৰ এই নতুন সংযোজনে অসমীয়া ভাষাত সমল বিচৰা লোকসকলৰ চাহিদা বহুলাংশে দূৰ কৰিব৷ উল্লেখৰ প্ৰয়োজন, এই কণ্টেণ্ট এপটোৱে ইতিমধ্যে মাৰাঠী, গুজৰাটী, তামিল, ভোজপুৰী ইত্যাদি স্থানীয় ভাষাত সেৱা আগবঢ়াই আহিছে৷ এই বৰ্ষৰ প্ৰাৰম্ভতে পৰীক্ষামূলকভাৱে ডেইলীহাণ্টত অসমীয়া ভাষাক অন্তৰ্ভুক্ত কৰোৱা হৈছিল আৰু কম সময়ৰ ভিতৰত ই জনপ্ৰিয় হৈ উঠিছিল৷ ডেইলীহাণ্টৰ তথ্য অনুসৰি, দৈনিক সক্ৰিয় ব্যৱহাৰকাৰীৰ ক্ষেত্ৰত অসমীয়া ভাষাৰ বিকাশৰ হাৰ হৈছে ৭৩ শতাংশ৷ অনলাইন জগতত অসমীয়া ভাষাৰ এনে জয়যাত্ৰাই অসমীয়া ভাষাৰ বিশ্বমুখী যাত্ৰাক অধিক ত্বৰান্বিত কৰাৰ লগতে ভাষাটোৰ চৰ্চা আৰু বিকাশৰ ক্ষেত্ৰত ই সহায়ক হোৱাৰ আশা কৰা হৈছে৷
Continue Reading
