ডিজিটেল ডেস্ক
ক্ৰিকেটৰ যাদুৰে দৰ্শকক মোহাচ্ছন্ন কৰি ৰখা দক্ষিণ আফ্ৰিকাৰ খেলুৱৈ ডেভিদ মিলাৰক সকলোৱে জানে৷ কিন্তু এইবাৰ খেলপথাৰৰ যুঁজত নমাৰ পূৰ্বে আন এখন মানসিক যুঁজৰহে দেওনা পাৰ হ’বলগীয়া হ’ল জনপ্ৰিয় ক্ৰিকেটাৰজন৷
বহুতৰে প্ৰিয় ক্ৰিকেটাৰজনে মাত্ৰ কেইদিনমান আগতে হেৰুৱাইছে নিজৰ কণমানি অনুৰাগীক৷
আজি ৰাঁচী খেলপথাৰত টীম ইণ্ডিয়াৰ মুখামুখি হোৱাৰ পূৰ্বে নিচেই কম বয়সতে পৃথিৱীৰ পৰা মেলানিমগা অনুৰাগীগৰাকীক সুঁৱৰি ডেভিদ মিলাৰে ছ’চিয়েল মিডিয়াত লিখিলে এক আৱেগিক প’ষ্ট৷
উল্লেখযোগ্য যে দীৰ্ঘদিন ধৰি কৰ্কট ৰোগত আক্ৰান্ত হৈ আছিল মিলাৰৰ অনুৰাগী গৰাকী ৷অনুৰাগী গৰাকীক যিকোনো প্ৰকাৰে সুস্থ কৰি তুলিবলৈ অহোপুৰুষাৰ্থ কৰিছিল আফ্ৰিকান ক্ৰিকেটাৰজনে৷ কিন্তু উন্নত পৰ্যায়ৰ চিকিৎসা লাভ কৰাৰ পিছতো নিয়তিৰ ওচৰত হাৰ মানিলে ডেভিদ মিলাৰৰ কণমানি অনুৰাগী গৰাকীয়ে৷
মৃত কন্যাক ইনষ্ট্ৰাগ্ৰামৰ প’ষ্টত ৰকষ্টাৰ বুলি অভিহিত কৰিলে ক্ৰিকেটাৰজনে৷ কেন্সাৰৰ বিৰুদ্ধে সাহসৰে যুঁজাৰ বাবে কণমানিজনীক প্ৰশংসাও কৰিলে ডেভিদ মিলাৰে৷ তেওঁৰ প্ৰতি থকা ডেভিদ মিলাৰৰ আকুলতা এই প’ষ্টটোৰ জৰিয়তেই স্পষ্ট হৈ পৰিছে৷ আৰু এতিয়া সেই দুৰ্ভগীয়া কণমানিজনীৰ মৃত্যুৰ দুখত ম্ৰিয়মাণ হৈ পৰিছে সমগ্ৰ বিশ্বৰ ক্ৰিকেটপ্ৰেমী ৰাইজ৷
আনকি সেই অনুৰাগী গৰাকীৰ সৈতে এটি ভিডিঅ’ও সামাজিক মাধ্যমত শ্বেয়াৰ কৰিছিল ক্ৰিকেটাৰজনে৷ ভিডিঅ’টোত দুয়োৰে মাজত থকা নিবিড় সম্পৰ্কৰ প্ৰতিচ্ছবি দেখা গৈছে৷ আনকি ক্ৰিকেটাৰৰ দৰে সাজসজ্জাতো দেখা গৈছিল কণমানিগৰাকীক৷এতিয়া সমগ্ৰ বিশ্ববাসীয়ে প্ৰাৰ্থনা কৰিছে , সৰগত সুখেৰে থাকক ডেভিদ মিলাৰৰ ৰকষ্টাৰ অনুৰাগীগৰাকী৷
Continue Reading
