ইউডিএফক প্ৰশ্ন কৰিলে পবিত্ৰ মাৰ্ঘেৰিটাই উত্তৰ দিয়ে কিয়? সংবাদমেলত সৰব অজাপ

উল্লেখযোগ্য যে এআইইউডিএফে জাতীয় পৰিষদলৈ মিত্ৰতাৰ প্ৰস্তাৱ প্ৰত্যাখ্যান কৰি দলৰ সভাপতি লুৰীণজ্যোতি গগৈয়ে কালি বদৰুদ্দিন আজমলক সমালোচনা কৰাৰ পাছতে লুৰীণজ্যোতিগগৈৰ বিৰুদ্ধে সৰব হৈ পৰিছিল সাংসদ মাৰ্ঘেৰিটা৷ তেওঁ লুৰীণজ্যোতি গগৈয়ে এটা ক্লাবতকৈ সৰু ৰাজনৈতিক দল চলোৱা বুলি জাতীয়তাবাদী নেতাগৰাকীক তাচ্ছিল্য কৰিছিল৷ 

আজি সাংবাদিকে এই সন্দৰ্ভত প্ৰশ্ন কৰাত জাতীয় পৰিষদৰ প্ৰচাৰ সম্পাদক জিয়াউৰ ৰহমানে কয়, আমি এআইইউডিএফক প্ৰশ্ন কৰিছোঁ৷ কিন্তু উত্তৰ দিছে পবিত্ৰ মাৰ্ঘেৰিটাই৷ আমি সমালোচনা কৰিছোঁ বদৰুদ্দিন আজমলক৷ কিন্তু প্ৰতিক্ৰিয়া প্ৰকাশ কৰিছে পবিত্ৰ মাৰ্ঘেৰিটাই৷ কিয়? ৰহস্যটো কি? তেওঁ ভাৰতৰ উচ্চ সদনৰ এগৰাকী সাংসদ৷ তেখেতৰ পদৰ মৰ্যদা আছে৷ কিন্তু তুচ্চ-তাচ্ছিল্য ভৰা বক্তব্যৰে তেওঁ নিজৰ পদমৰ্যদা অৱনমিত কৰিছে৷ এয়া মূল্যবোধহীন ৰাজনীতি৷ তেওঁৰ স্তৰলৈকে নামি যাব পৰা হ’লে আমিও তেওঁক তেওঁৰ ভাষাৰে উত্তৰ দিব পাৰিলোঁহেঁতেন৷ কাৰণ তেওঁৰ সাংস্কৃতিক আৰু ৰাজনৈতিক জীৱনৰ ইতিহাস আমি জানো৷ কিন্তু আমি মূল্যবোধৰ ৰাজনীতিত বিশ্বাস কৰো৷ বিৰোধীৰ সমালোচনাক সহ্য কৰাৰ সহনশীলতাখিনি শাসক দলৰ থকা উচিত৷ এয়াই আমাৰ দেশৰ গণতান্ত্ৰিক পৰম্পৰা৷