ডিজিটেল ডেস্ক
ৰাছিয়া–ইউক্ৰেইনৰ যুদ্ধই কেৱল দুইখন দেশৰ নাগৰিকৰ জীৱন বিধস্ত কৰা নাই৷ একে সময়তে বহু ভাৰতীয় শিক্ষাৰ্থীৰো জীৱন বিপন্ন কৰি তুলিছিল৷ ইউক্ৰেইনত চিকিৎসা বিজ্ঞানৰ শিক্ষা গ্ৰহণ কৰি থকা বহু ভাৰতীয় শিক্ষাৰ্থী কোনোমতে প্ৰাণটো লৈ ভাৰতলৈ উভতি আহিছিল৷ বহু ধন ব্যয় কৰি বিদেশত শিক্ষা গ্ৰহণ কৰিবলৈ যোৱা ভাৰতীয় শিক্ষাৰ্থীসকলৰ ভৱিষ্যতো হৈ পৰিছিল অনিশ্চিত৷ আনহাতে স্বদেশতো তেওঁলোকৰ বাবে নাছিল উপযুক্ত সংস্থাপনৰ ব্যৱস্থা৷
একে এক সময়তে এইসকল ভাৰতীয় শিক্ষাৰ্থীৰ বাবে আশাৰ বতৰা কঢ়িয়াই আনিলে ৰাছিয়াই৷ ইউক্ৰেইন আৰু ৰাছিয়াৰ যুদ্ধৰ বাবে শিক্ষা আধৰুৱা কৰি ঘৰলৈ ঘূৰি অহা শিক্ষাৰ্থীসকলক পুনৰ শিক্ষা গ্ৰহণৰ সুযোগ দিলে ৰাছিয়াই৷
ৰাছিয়াৰ ৰাষ্ট্ৰদূত ওলেগ আদিভে চেন্নাইৰ এক অনুষ্ঠানত এই কথা ঘোষণা কৰে৷ইউক্ৰেইনৰ পৰা যিসকল ভাৰতীয় শিক্ষাৰ্থীয়ে উভতি আহিছে পঢ়া–শুনা এৰি, তেওঁলোকক সুযোগ দিবলৈ প্ৰস্তুত ৰাছিয়া। লগতে ৰাষ্ট্ৰদূতজনে উল্লেখ কৰে যে , ইউক্ৰেইন আৰু ৰাছিয়াৰ মেডিকেল পাঠ্যক্ৰম প্ৰায় একে।গতিকে শিক্ষাৰ্থীসকলে সহজেই এই পাঠ্যক্ৰমত খাপ খাই পৰিব৷ফলত তেওঁলোকে অসমাপ্ত পাঠ্যক্ৰম ৰাছিয়াত সমাপ্ত কৰিব পাৰিব আৰু তেওঁলোকক আন্তৰিকতাৰে আদৰিবলৈ ৰাছিয়া সদায় প্ৰস্তুত৷
পৰিতাপৰ বিষয় যে ইউক্ৰেইনৰ বৰ্তমানেও ৰাছিয়াৰ যুদ্ধ এতিয়াও অন্ত পৰা নাই। দুয়ো দেশৰ বহু অঞ্চল এতিয়াও অশান্ত হৈ আছে৷ ৰাছিয়াৰ এই পদক্ষেপে শিক্ষাৰ্থীসকলৰ মনত নতুন আশাৰ সঞ্চাৰ কৰিছে যদিও যুদ্ধৰ দাৱানল জ্বলি থকা দেশ এখনত শিক্ষাৰ্থীসকল কিমানদূৰ লাভান্বিত হ’ব সেইয়া সময়েহে ক’ব৷
Continue Reading
