ডিজিটেল ডেস্কঃ ৰাছিয়া-ইউক্ৰেইন যুদ্ধকলৈ পশ্চিমীয়া দেশসমূহৰ সৈতে ৰাছিয়াৰ সংঘাত বৃদ্ধি পাইছে৷ ইউক্ৰেইনক সামৰিক শক্তিৰে সহায় কৰি থকা আমেৰিকাৰ স্থিতিকলৈও এতিয়া প্ৰশ্ন উত্থাপন হৈছে৷ ৰাছিয়াই ইউক্ৰেইন আক্ৰমণ কৰাৰ এবছৰ পূৰ হ’ব৷ ২৪ ফেব্ৰুৱাৰীত ৷ শেহতীয়াকৈ আন্তঃৰাষ্ট্ৰীয় সংবাদ মাধ্যমত প্ৰকাশিত এক প্ৰতিবেদনে আলোড়ণৰ সৃষ্টি কৰিছে৷
প্ৰতিবেদনখনত দাবী কৰা হৈছে যে আমেৰিকাৰ ৰাষ্ট্ৰপতি জো বিডেনে ৰাছিয়া-ইউক্ৰেইনৰ যুদ্ধ সমাপ্ত কৰাৰ বাবে ৰাছিয়াৰ ৰাষ্ট্ৰপতি ভ্লাদিমিৰ পুটিনক ইউক্ৰেইনৰ ২০% এলেকা এৰি দিবলৈ প্ৰস্তাৱ আগবঢ়াইছে। চুইছ-জাৰ্মান বাতৰি কাকত নিউ জাৰছাৰ জেইটুং আৰু ৱাশ্বিংটন পোষ্টত প্ৰকাশিত প্ৰতিবেদনত এই দাবী কৰা হৈছে৷ প্ৰতিবেদন অনুসৰি চিআইএৰ সঞ্চালক উইলিয়াম বাৰ্ণছে ৰাছিয়াৰ ৰাষ্ট্ৰপতি ভ্লাদিমিৰ পুটিনক ৰাষ্ট্ৰপতি জো বিডেনৰ হৈ প্ৰস্তুত কৰা শান্তি পৰিকল্পনাৰ অংশ হিচাপে চলিত যুদ্ধৰ সমাপ্তিৰ বাবে ইউক্ৰেইনৰ এক পঞ্চমাংশ অঞ্চল আগবঢ়াইছিল।
প্ৰতিবেদনত দাবী কৰা হৈছে যে চিআইএ ৰ সঞ্চালকে গোপনে মস্কো ভ্ৰমণ কৰিছিল আৰু ক্ৰেমলিনক শান্তি প্ৰস্তাৱৰ বিষয়ে অৱগত কৰিছিল ৷ তাৰ পিছত তেওঁ কিয়েভভ্ৰমণ কৰিছিল আৰু ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিক লগ কৰিছিল প্ৰস্তাৱটো আলোচনা কৰিবলৈ । শেহতীয়াকৈ প্ৰকাশিত ইয়াৰ প্ৰতিবেদনত উচ্চ পদস্থ জাৰ্মান ৰাজনীতিবিদসকলৰ উদ্ধৃতি দিয়া হৈছে৷ ৱাশ্বিংটন পোষ্টে এইবুলি প্ৰতিবেদন দিছে যে বাৰ্ণছে যুদ্ধৰত দেশ দুখনৰ মাজত শান্তি চুক্তি সম্পাদন কৰিবলৈ চেষ্টা কৰি আছিল , কিন্তু কিয়েভ আৰু মস্কোই সেই প্ৰস্তাৱ নাকচ কৰিছিল । অৱশ্যে হোৱাইট হাউচে প্ৰতিবেদনখন অস্বীকাৰ কৰিছে। আমেৰিকান সংবাদ মাধ্যম নিউজউইকে হোৱাইট হাউচ ৰাষ্ট্ৰীয় সুৰক্ষা পৰিষদৰ উপ-মুখপাত্ৰ ছিন ডেভেটৰ উদ্ধৃতি দি প্ৰতিবেদনখনক "সঠিক নহয়" বুলি অভিহিত কৰিছে।
