ডিজিটেল ডেস্কঃ চাইবাৰ অপৰাধীৰে ভৰি পৰিছে দেশ। কঠোৰ পৰিশ্ৰম অবিহনে উচ্চ দৰমহাৰ প্ৰলোভন দি এতিয়া প্ৰতাৰক চক্ৰই বহুতকে ঠগি আহিছে। অলপ অসতৰ্ক হ’লেই এতিয়া যিকোনো লোকেই পৰিব পাৰে এই চক্ৰটোৰ জালত।
শেহতীয়াকৈ নয়ডাৰ এগৰাকী মহিলা এনে চাইবাৰ অপৰাধাৰ ফান্দত পৰিছে। তেওঁক কোৱা হৈছিল যে কেইটামান ইউটিউব ভিডিঅ' লাইক কৰিলেই তেওঁ যথেষ্ট ধন উপাৰ্জন কৰিব পাৰিব। এনে কৰাৰ পিছতে মহিলাগৰাকীয়ে বৃহৎ পৰিমাণৰ ধন হেৰুৱাই হতাশ হৈ পৰে। প্ৰতাৰিত হৈছে বুলি অনুভৱ কৰি তেওঁ আৰক্ষীৰ ওচৰ চাপিছে আৰু এই বিষয়ত অভিযোগ দাখিল কৰিছে। আৰক্ষীয়ে ইতিমধ্যে ঘটনাটোৰ তদন্ত আৰম্ভ কৰিছে। উল্লেখ্য ছ'চিয়েল মিডিয়া প্লেটফৰ্ম হোৱাটছএপ প্ৰৱঞ্চকসকলৰ অন্যতম মাধ্যম হৈ পৰিছে। নয়ডাৰ চেক্টৰ ৬১ ৰ মহিলাগৰাকীক চক্ৰটোৱে প্ৰথমে হোৱাটছএপত যোগাযোগ কৰিছিল।
অধিক ধন আহৰণৰ লোভ দেখুৱাই চক্ৰটোৱে মহিলাগৰাকীক প্ৰৱঞ্চনা কৰে। তেওঁক ই-কমাৰ্চ ৱেবছাইটত ইউটিউব ভিডিঅ'বোৰ লাইক, শ্বেয়াৰ আৰু চাবস্ক্ৰাইব কৰি ঘৰত লাখ লাখ টকা উপাৰ্জন কৰিব পাৰি বুলি কোৱা হৈছিল। মহিলাগৰাকীয়ে তেনে কৰাৰ পিছত তেওঁক এটা টেলিগ্ৰাম গোটত অন্তৰ্ভুক্ত কৰা হয় আৰু কেইটামান ইউটিউব ভিডিঅ'ত লাইক, মন্তব্য আৰু শ্বেয়াৰ কৰিবলৈ কোৱা হয়। মহিলাগৰাকীৰ বিশ্বাস অৰ্জন কৰিবলৈ তেওঁৰ একাউণ্টত কিছু টকাও জমা কৰা হৈছিল।
মহিলাগৰাকীলৈ কেইবাটাও নতুন ইউটিউব ভিডিঅ' প্ৰেৰণ কৰা হৈছিল। সেইবোৰত লাইক কৰাৰ পিছতে মহিলাগৰাকীৰ একাউণ্টৰ পৰা ৪ লাখ ৩৮ হাজাৰ টকা চক্ৰটোৱে প্ৰযুক্তিৰ জাল পেলাই সৰকাই নিয়ে। মহিলাগৰাকীৰ পৰা ভিডিঅ’ লাইক কৰাৰ সময়তে বিভিন্ন কৌশলেৰে চক্ৰটোৱে তেওঁৰ বেংক একাউণ্টৰ বহু তথ্য সৰকাই লৈছিল। যিকোনো ভিডিঅ’টোৱে লাইক, কমেণ্ট কৰা কিমান বিপজ্জনক হ’ব পাৰে সেয়া পুনৰবাৰ প্ৰমাণ হ’ল এই ঘটনাটোৰ পৰাই।
Continue Reading
