জামিন লাভ কৰিলে শ্ৰীলংকাৰ ক্ৰিকেটাৰ দানুষ্কা গুণতিলকে, ধৰ্ষণৰ অভিযোগত অষ্ট্ৰেলিয়াত গ্ৰেপ্তাৰ হৈছিল তেওঁ

ডিজিটেল ডেস্কঃ অৱশেষত জামিন পালে দানুষ্কা গুণতিলকে। টি২০ বিশ্বকাপৰ মাজতে ধৰ্ষণৰ অভিযোগত গ্ৰেপ্তাৰ হৈছিল শ্ৰীলংকাৰ ক্ৰিকেটাৰগৰকী। বৃহস্পতিবাৰে তেওঁক চিডনীৰ এখন আদালতে জামিন প্ৰদান কৰে।

আদালতৰ তৰফৰ পৰা জনোৱা হৈছে যে শ্ৰীলংকাৰ চৰকাৰ আৰু শ্ৰীলংকাৰ ক্ৰিটেক ব’ৰ্ডে ক্ৰিকেটাৰগৰাকীৰ পক্ষ লোৱাৰ বাবেই জামিন প্ৰদান কৰা হৈছে। ২ লাখ অষ্ট্ৰেলিয়ান ডলাৰৰ বিনিময়ত এই জামিন মঞ্জুৰ কৰা হৈছে। জামিন লাভ কৰিলেও সদ্যহতে দেশলৈ ঘূৰিব নোৱাৰিব ক্ৰিকেটাৰগৰাকী।

উল্লেখ্য যে বিশ্বকাপৰ মাজভাগতে মাজৰাতি চিডনীৰ হোটেলৰ পৰা গ্ৰেপ্তাৰ কৰা হৈছিল গুণতিলকক। তেওঁৰ বিৰুদ্ধে চাৰিটাকৈ ধৰ্ষণ আৰু শাৰিৰীক নিৰ্যাতনৰ অভিযোগ অনা হৈছিল।

কিন্তু যিগৰাকী মহিলাই তেওঁৰ বিৰুদ্ধে শাৰিৰীক নিৰ্যাতন আৰু ধৰ্ষণৰ অভিযোগ আনিছিল, তেওঁৰ অভিযোগসমূহৰ পৰীক্ষা নিৰীক্ষাত আৰক্ষীয়ে বিশেষ একো নাপালে।

এতিয়া জামিন লাভ কৰিলেও কিছু চৰ্ত মানি চলিব লাগিব গুণতিলকক। প্ৰতিদিনাই থানাত হাজিৰা দিব লাগিব আৰু অভিযোগকাৰী মহিলাগৰাকীৰ স’তে যোগাযোগ কৰিব নোৱাৰি। কোনোধৰণৰ ডেটিং এপো ব্যৱহাৰ কৰিব নোৱাৰিব। পৰৱৰ্তী শুনানি হিচাপে আদালতে ১২ জানুৱাৰী তাৰিখে স্থিৰ কৰিছে।