ডিজিটেল ডেস্কঃ এতিয়াও নুমুৱা নাই মণিপুৰৰ হিংসাৰ জুই। কেন্দ্ৰীয় মন্ত্ৰী অমিত শ্বাহৰ মণিপুৰ ভ্ৰমণৰ এদিন পূৰ্বে দেওবাৰে মণিপুৰৰ কেইবাটাও স্থানত সংঘটিত হোৱা নতুন হিংসাত্মক পৰিস্থিতিত এজন আৰক্ষীসহ কমেও পাঁচজন লোক নিহত হোৱাৰ লগতে ১২ জন লোক আহত হয়। আজি মণিপুৰত উপস্থিত হোৱাৰ সম্ভাৱনা আছে অমিত শ্বাহ। আহত নিৰাপত্তাৰক্ষীক চিকিৎসাৰ বাবে ৰাজ মেডিচিটি হাস্পতালত ভৰ্তি কৰোৱা হৈছে।
দেওবাৰে কাকচিং জিলাৰ ছেৰৌ আৰু চুগুনু অঞ্চলত ৰাজ্য চৰকাৰে ‘সন্ত্রাসবাদী’ বুলি অভিযুক্ত কৰা কুকি উগ্ৰপন্থীয়ে বহু ঘৰত অগ্নিসংযোগ কৰাৰ পাছতে ৰাজ্যখনৰ কেইবাটাও অঞ্চলত নতুনকৈ হিংসাত্মক পৰিস্থিতিৰ সৃষ্টি হয়। এজন আৰক্ষী বিষয়াই জনোৱা মতে, দেওবাৰে পুৱাৰ ভাগত ইম্ফল উপত্যকাৰ আশে-পাশে থকা কেইবাটাও স্থানত সংঘৰ্ষৰ সৃষ্টি হয়।
মণিপুৰৰ মুখ্যমন্ত্ৰী এন বীৰেণ সিঙে কয় যে বিদ্ৰোহ বিৰোধী অভিযানত ঘৰ জ্বলোৱা আৰু সাধাৰণ নাগৰিকৰ ওপৰত গুলীচালনাত জড়িত কমেও ৪০ জন সশস্ত্ৰ উগ্ৰপন্থী নিহত হৈছে।
‘আমি কঠোৰ ব্যৱস্থা গ্ৰহণ কৰিছো। এতিয়ালৈকে আমাৰ হাতত প্ৰায় ৪০ জন সন্ত্ৰাসবাদীক নিৰ্মূল কৰা হৈছে বুলি খবৰ আহিছে।’ এই মন্তব্য মণিপুৰৰ মুখ্যমন্ত্ৰী এন বীৰেণ সিঙৰ।
বৰ্তমান ভাৰতীয় সেনা আৰু অসম ৰাইফলছৰ কেইবাহাজাৰো জোৱান ৰাজ্যখনত নিয়োজিত হৈ আছে। এতিয়ালৈকে হাজাৰ হাজাৰ লোকক উদ্ধাৰ কৰি নিৰাপদ স্থানলৈ লৈ যোৱা হৈছে। অধিকাংশ লোকক চুৰাচান্দপুৰ, মৰে, কাকচিং আৰু কাংপোকপি জিলাৰ পৰা উলিয়াই আনি নিৰাপদ স্থানলৈ প্ৰেৰণ কৰা হৈছে।
Continue Reading
