ডিজিটেল ডেস্কঃ পুৰীৰ জগন্নাথ মন্দিৰত ভোগৰ গৰম দাইল চিটিকি পৰি দুজন লোক গুৰুতৰভাৱে আহত হৈছে। ঘটনাটো পুৰীৰ মন্দিৰ চৌহদৰ ভোগ পেণ্ডেলত সংঘটিত হৈছে। মন্দিৰৰ দুজন বোধিয়া সেৱাই (যিসকলে জগন্নাথ মন্দিৰলৈ মহাপ্ৰসাদ কঢ়িয়াই আনে) তেওঁলোকে মূৰত দাইলৰ পাত্ৰ কঢ়িয়াই লৈ গৈছিল।
কিন্তু বাটটো পিছল হোৱা বাবে প্ৰথমে এজন লোক পৰি যায়। তেওঁৰ পিছতে দ্বিতীয় লোক এজনো পিছলি পৰে। ফলত গৰম দাইল দুয়োজন লোকৰ শৰীৰতে পৰি যায়। ঘটনাটোত দুয়োজন সেৱকৰ শৰীৰ পুৰি যায় ।তেওঁলোকক সংকটজনক অৱস্থাত চিকিৎসালয়লৈনিয়াৰ ব্যৱস্থা কৰা হয় তেওঁলোকক পুৰীৰ সদৰ চিকিৎসালয়ত চিকিৎসাধীন কৰোৱা হৈছে। এই ঘটনাৰ পিছতে আকৌ এবাৰ পুৰীৰ ভোগ মণ্ডপৰ পৰা মন্দিৰৰ বিগ্ৰহলৈকে থকা পথছোৱাৰ অৱস্থাকলৈ পুনৰ প্ৰশ্ন উত্থাপন হৈছে।
দৈনিক লাখ লাখ ভক্তৰ সমাগম ঘটা মন্দিৰটোৰ এই পথছোৱা অতি বেয়া। মন্দিৰ চৌহদৰ ৰাস্তাটো পানী পৰি থকা বাবে প্ৰায় সকলো সময়তে পিছল হৈ থাকে। প্ৰতিদিনে ভগৱান জগন্নাথৰ ভোগ অনাৰ দায়িত্বত থকা বোধিয়া সেৱকসকলে সেই বিপজ্জনক পথেৰেই মূৰত গৰম ভোগৰ পাত্ৰ কঢ়িয়াই নিবলগীয়া হৈছে। পূৰ্বেও সেই স্থানত বহু দুৰ্ঘটনা সংঘটিত হৈছে। ইমানৰ পিছতো মন্দিৰ কৰ্তৃপক্ষই বিষয়টোত গুৰুত্ব প্ৰদান নকৰাৰ অভিযোগ উঠিছে।
শেহতীয়াকৈ গৰম দাইল পৰি আহত হোৱা সেৱক দুজন হৈছে প্ৰদীপ কুমাৰ চাহু আৰু পাপী প্ৰধান । তেওঁলোকৰ মাজৰে এজন উৰিষ্যাৰ ব্ৰহ্মগিৰিৰ বাসিন্দা। আনজন তালাজঙৰ বাসিন্দা। মন্দিৰৰ বোধিয়া সেৱাতসকলৰ সংগঠন বোধাক সংঘৰ সভাপতি ৰোহিত দাসে কয়, "ভোগ পেণ্ডেলৰ ৰাস্তাটো গোটেই দিনটো পানী পৰি পিছল হৈ থাকে। গতিকে যেতিয়াই আমি সেই ৰাস্তাৰে যাওঁ, অতি সাৱধানে যাওঁ। বিশেষকৈ যদি মূৰত প্ৰসাদ থাকে,অধিক সাৱধান হ'বলগীয়া হয়। কিন্তু ইমানৰ পিছতো দুৰ্ঘটনা সংঘটিত হয়। এনে ঘটনা আগতেও বহুবাৰ ঘটিছে। ''
Continue Reading
