ডিজিটেল ডেস্কঃ ভূমিস্খলনৰ ফলত বিধ্বস্ত হৈ পৰিছে জম্মু-শ্ৰীনগৰ ৰাষ্ট্ৰীয় ঘাইপথ । ঘাইপথতো পুনৰ অস্থায়ীভাৱে বন্ধ কৰি দিয়া হৈছে। ফলত অমৰনাথ যাত্ৰাও সাময়িকভাৱে বন্ধ হৈ পৰিছে। প্ৰাকৃতিক দুৰ্যোগৰ ফলত জম্মু আৰু শ্ৰীনগৰৰ মাজৰ ৰাষ্ট্ৰীয় ঘাইপথৰ ৰামবেন অঞ্চলত ব্যাপক ক্ষতি হৈছে।
জম্মু-কাশ্মীৰ আৰক্ষীয়ে কৈছে যে এতিয়ালৈকে প্ৰশাসনৰ অনুমতি অবিহনে ৰাষ্ট্ৰীয় ঘাইপথৰ অঞ্চলটোত কোনো বাহন চলাচল কৰিবলৈ দিয়া হোৱা নাই। জম্মু-কাশ্মীৰ যান-বাহন আৰক্ষীয়ে এক বিবৃতিত কয় যে জম্মু-শ্ৰীনগৰ ৰাষ্ট্ৰীয় ঘাইপথৰ জম্মুৰ পৰা শ্ৰীনগৰলৈ থকা পথত অমৰনাথ যাত্ৰা ভূমিস্খলনৰ বাবে স্থগিত ৰখা হৈছে। উল্লেখ্য যে দেওবাৰে তীৰ্থযাত্ৰীসকলে চন্দ্ৰকোট শিবিৰত উপস্থিত হোৱাৰ সময়তো যাত্ৰা সাময়িকভাৱে স্থগিত ৰখা হৈছিল।
উল্লেখ্য অমৰনাথ যাত্ৰা ১ জুলাইত আৰম্ভ হৈছিল। এতিয়ালৈকে এক লাখতকৈও অধিক তীৰ্থযাত্ৰীয়ে অমৰনাথ যাত্ৰাত ভাগ লৈছে। প্ৰায় ১৯,০০০ তীৰ্থযাত্ৰীয়ে ৫ জুলাইত অমৰনাথলৈ ৰাওনা হৈছিল। কিন্তু পিছদিনাৰ পৰা হোৱা ধাৰাসাৰ বৰষুণ আৰু প্ৰতিকূল বতৰৰ বাবে তীৰ্থযাত্ৰীসকলক জম্মুৰ বিভিন্ন স্থানত ৰখাই দিয়া হৈছিল। ভূমিস্খলনৰ ফলত জম্মু-শ্ৰীনগৰ ৰাষ্ট্ৰীয় ঘাইপথ কেইবাবাৰো সাময়িকভাৱে বন্ধ কৰি দিয়া হৈছিল।
Continue Reading
