ডিজিটেল ডেস্কঃ জনসংখ্যাৰ দিশৰ পৰা চীনক চেৰ পেলাই ভাৰত এতিয়া বিশ্বৰ প্ৰথম স্থানত থকা দেশত পৰিণত হৈছে৷ এক কথাত ক’বলৈ গ’লে চীনৰ জনসংখ্যা দ্ৰুত হাৰত হ্ৰাস পাইছে। দেশ খনত বৃদ্ধ আৰু বিকলাঙ্গ লোকৰ সংখ্যা বৃদ্ধি পাইছে। এনে পৰিস্থিতিত চীনে জনসংখ্যা বৃদ্ধিৰ বাবে এক নতুন পদ্ধতি গ্ৰহণ কৰিছে। এতিয়া চীনৰ প্ৰশাসনে অবিবাহিতা মহিলাসকলকো আইভিএফ পদ্ধতিৰ জড়িয়তে সন্তান জন্ম দিবলৈ অনুমতি দিছে।
চীনৰ চৰকাৰৰ পৰা এই কথাও জনোৱা হৈছে যে অবিবাহিতা যুৱতীসকলকো প্ৰসূতিৰ সমস্ত চৰকাৰী লাভালাভ প্ৰদান কৰা হ'ব।ইতিপূৰ্বে চীনৰ কেইখনমান প্ৰদেশত, যেনে ছিঝৌত, অবিবাহিত যুৱতীসকলক সন্তান জন্ম দিবলৈ অনুমতি দিয়া হৈছিল। এতিয়া আদেশটো সমগ্ৰ দেশতে কাৰ্যকৰী কৰা হৈছে। চীনা প্ৰশাসন জনসংখ্যা হ্ৰাসক লৈ যথেষ্ট চিন্তিত বাবেই এনে সিদ্ধান্ত গ্ৰহণ কৰা বুলি ধাৰণা কৰা হৈছে৷
এনে পৰিস্থিতিত চীনৰ জনসংখ্যা বিশেষজ্ঞসকলে দাবী কৰিছে যে যদি অবিবাহিতা মহিলাসকলক সন্তান জন্ম দিবলৈ অনুমতি দিয়া হয়, তেন্তে জন্মৰ হাৰ যথেষ্ট বৃদ্ধি হ'ব পাৰে। চীনা প্ৰশাসনে এইবুলিও কৈছে যে অবিবাহিতা মাতৃসকলে বিবাহিত লোকৰ দৰেই সকলো সুবিধা লাভ কৰিব। তেওঁলোকে কামত দৰমহাসহ ছুটি, তেওঁলোকৰ সন্তানৰ বাবে আৰ্থিক সহায় আদি লাভ কৰিব।
চীনৰ বহু মহিলা এতিয়া প্ৰশাসনৰ এনে নিৰ্দেশত যথেষ্ট সুখী হৈ পৰা পৰিলক্ষিত হৈছে। এগৰাকী বিবাহ বিচ্ছেদহোৱা মহিলা চেন লুওজিনৰ মতে, "বিবাহিত জীৱন সকলোৰে বাবে সমান নহয়। কিন্তু সন্তান জন্ম দিয়াৰ বিষয়টো বিবাহৰ সৈতে একেলগ কৰাটো সঠিক নহয়। "
উল্লেখ্য আইভিএফ চিকিৎসা পদ্ধতি হৈছে বিশ্বৰ আটাইতকৈ লাভজনক ব্যৱসায়বোৰৰ ভিতৰত এটা হিচাবে পৰিগণিত হৈছে। অবিবাহিতা মহিলাসকলৰ ভিতৰত চীনত আইভিএফ চিকিৎসাৰ চাহিদা হয়তো চৰকাৰী নিৰ্দেশৰ পিছতে বৃদ্ধি হ'ব। এই কথা মনত ৰাখিয়েই কেইবাজনো বিনিয়োগকাৰীয়ে ইতিমধ্যে চীনৰ চিকিৎসা খণ্ডত বিনিয়োগ কৰাৰ সিদ্ধান্ত লৈছে।
Continue Reading
