জনতাৰ ওপৰত নতুন নতুন কৰৰ বোজা, তৃণমূল কংগ্ৰেছৰ ভর্ৎসনা

নৰেন্দ্ৰ মোদী চৰকাৰৰ দিনত ক্ষুদ্ৰ, লঘু আৰু মজলীয়া উদ্যোগসমূহ বন্ধ হৈ অহাৰ ফলত ভাৰতৰ ঘৰুৱা উৎপাদন ব্যৱস্থাৰ কঁকাল ভাঙি গৈছে৷ নৰেন্দ্ৰ মোদীৰ ‘আত্মনিৰ্ভৰ ভাৰত’ পৰিকল্পনাই ক্ষুদ্ৰ, লঘু আৰু মজলীয়া উদ্যোগৰ প্ৰাণ সঞ্চাৰ কৰিব নোৱাৰিলে৷ ইয়াৰ মূলতে নৰেন্দ্ৰ মোদী চৰকাৰৰ পৰিকল্পনাৰ অভাৱ আৰু সামগ্ৰীৰ অত্যধিক মূল্যবৃদ্ধি৷ ক্ষুদ্ৰ, লঘু আৰু মজলীয়া উদ্যোগ বন্ধ হৈ পৰাত অৰ্থনীত বিধ্বস্ত হৈ পৰিছে৷ আজি ডলাৰৰ তুলনাত সকলো অভিলেখ ভংগ কৰি টকাৰ মূল্য হ্ৰাস হৈছে৷ সকলো বস্তুৰ মূল্যবৃদ্ধিৰ ফলত নাগৰিকে ককবকাই আছে৷ উপাৰ্জনহীন হৈ পৰা নাগৰিকে দুবেলা-দুমুঠি খাবলৈ নোপোৱা হ’ল৷ 

নৰেন্দ্ৰ মোদীৰ চৰকাৰৰ ভুল নীতিৰ বাবে আজিৰে পৰা একাধিক নিত্য ব্যৱহাৰ্য সামগ্ৰীৰ দাম বৃদ্ধি পালে৷ অমৃতকাল, অচ্ছেদিন, নিউ ইণ্ডিয়াত পেকেজত বিক্ৰী কৰা সামগ্ৰী, দুগ্ধজাত সামগ্ৰীৰ লগতে দৈ, আটা, চাউল, অ’টছ, বাৰ্লি, পাপৰ, লাচ্চি, মাংস, মাছ, পিঠাগুড়ি, চিৰা, মুৰি, গুড়ৰ দাম বাঢ়িল৷ প্ৰতি কেজি চাউলত ৫ টকালৈ বৃদ্ধি হ’ব৷ ড্ৰাই ফুড, মৌ, মাখন, ঘেঁহুত অত্যধিক জিএছটি আৰোপ কৰিলে৷ শিক্ষণ সামগ্ৰী যেনে- পেঞ্চিল, চিয়াঁহী, এল.ই.ডি লেম্পতো ১২-১৮ শতাংশ জিএছটি আৰোপ কৰা হ’ল৷ চামৰাজাতীয় সামগ্ৰীত ৫-১২ শতাংশ জিএছটি বৃদ্ধি কৰা হৈছে। চিকিৎসালয়ৰ কোঠা, হোটেলৰ ভাৰা, ইলেক্ট্ৰ’নিক বাহন, ফলৰ ৰসজাতীয় সামগ্ৰীৰ দাম বৃদ্ধি কৰা হ’ল৷ হাস্পতালত থকা ৰোগীৰ পৰিয়ালৰ পৰা ধন শৰাধ কৰিব চৰকাৰে৷ হোটেলৰ কোঠাৰ ভাৰা, ভূচিত্ৰাৱলী, মেপ, ছাৰ্ট আদিত ১০০০ হাজাৰ পৰ্যন্ত অতিৰিক্ত ভৰিব লাগিব৷ এনে সামগ্ৰীত ১২ শতাংশ জিএছটি আৰোপ কৰিছে৷ চেক ইছ্যূ কৰিবলৈ বেংকৰ দ্বাৰা লোৱা মাচুলত ১৮ শতাংশ জিএছটি ল’ব নৰেন্দ্ৰ মোদী চৰকাৰে৷ এয়া বিপদত পৰা নাগৰিকৰ ঘৰত সিন্ধি সান্ধি ধনৰ শৰাধ কৰিছে৷

মোদী ডাঙৰীয়াৰ এয়াই অচ্ছেদিন আছিল নে? সকলো সামগ্ৰীৰ মূল্যবৃদ্ধি ৰোধ কৰি মানুহক জীয়াই থকাৰ পৰিৱেশ দিয়াৰ লগতে ৰাজহুৱা বিতৰণ ব্যৱস্থা অধিক শক্তিশালী কৰাৰ দাবী জনালো।