ডিজিটেল ডেস্কঃ টকা, টকা, কেৱল টকা... যিফালেই চাই সেইফালেই টকা। আয়কৰ বিভাগে আগ্ৰাত তিনিজন জোতা ব্যৱসায়ীৰ ঘৰত তালাচী চলাই উদ্ধাৰ কৰিছে টকাৰ পাহাৰ। এতিয়ালৈকে গণনা কৰা পৰিমাণ টকাৰ পৰিমাণ ৪০ কোটি টকা বুলি জানিব পৰা গৈছে। ইয়াৰ বেছিভাগেই ৫০০ টকীয়া নোট। টকাৰ গণনা এতিয়াও চলি আছে। আগ্ৰাৰ তিনিজন জোতা ব্যৱসায়ীৰ বিৰুদ্ধে কৰ ফাঁকি দিয়াৰ অভিযোগ উত্থাপিত হৈছিল।
আয়কৰ বিভাগে শনিবাৰে আবেলি ব্যৱসায়ীকেইজনৰ ঘৰত অভিযান চলোৱা আৰম্ভ কৰিছিল। শনিবাৰে আবেলি প্ৰায় ৩ বজাত আয়কৰ বিভাগৰ বিষয়াসকলে কেইবাটাও দলত বিভক্ত হৈ আগ্ৰাৰ তিনিজন জোতা ব্যৱসায়ীৰ ঘৰ, শ্ব'ৰুম আৰু কাৰ্যালয়ত তালাচী চলায়। তিনিওজন জোতা ব্যৱসায়ীৰ ঘৰৰ পৰা বৃহৎ পৰিমাণৰ ধনৰ লগতে বহু আপত্তিজনক নথি-পত্ৰও জব্দ কৰা হৈছে।
আয়কৰ বিভাগৰ বিষয়াসকলে এজন ব্যৱসায়ীৰ ঘৰত ধনৰ পাহাৰ বিচাৰি পায়। ব্যৱসায়ীজনৰ ঘৰৰ য’তে-ত’তে লুকুৱাই ৰখা হৈছিল কেৱল টকা। লগে লগে টকা গণনা কৰিবলৈ যন্ত্ৰ অনা হয়। যন্ত্ৰৰ দ্বাৰা গণিও এতিয়ালৈকে সম্পূৰ্ণ হিচাব উলিয়াব পৰা হোৱা নাই উদ্ধাৰ হোৱা টকাৰ। গণনাৰ কামো চলিয়েই আছে। ধনৰ পৰিমাণ বৃদ্ধি হ'ব পাৰে। কেৱল কোটি কোটি টকাই নহয়, এই ব্যৱসায়ীসকলৰ পৰা কিছুমান গুৰুত্বপূৰ্ণ নথি-পত্ৰও জব্দ কৰা হৈছে।
আয়কৰ বিভাগৰ সূত্ৰই প্ৰকাশ কৰা অনুসৰি, তিনিওজন আগ্ৰাৰ প্ৰতিষ্ঠিত ব্যৱসায়ী। তেওঁলোকৰ বিৰুদ্ধে উপাৰ্জনতকৈ অধিক সম্পত্তি থকাৰ এটা গোচৰ বিৰুদ্ধে পঞ্জীয়ন কৰা হৈছে। তিনিওজম ব্যৱসায়ীয়ে কৰ ফাঁকি দিয়াৰ অভিযোগ বহু দিনৰে পৰাই উঠি আহিছিল। ব্যৱসায়ীসকলৰ ম'বাইল, লেপটপ আৰু কম্পিউটাৰ জব্দ কৰা হৈছে বুলি এজন তদন্তকাৰী বিষয়াই জানিবলৈ দিছে। লোকসভা নিৰ্বাচনৰ সময়তে এনেদৰে বৃহৎ পৰিমাণৰ ধন উদ্ধাৰ হোৱাৰ কথাই বিশেষ গুৰুত্ব বহন কৰিছে।
Continue Reading
