কৰ ফাঁকিৰ অভিযোগ, ট্ৰাম্প সন্তানক আদালতত হাজিৰ হোৱাৰ নিৰ্দেশ

ৱাশ্বিংটনঃ আমেৰিকা যুক্তৰাষ্ট্ৰৰ প্ৰাক্তন ৰাষ্ট্ৰপতি ড’নাল্ড ট্ৰাম্পৰ জ্যেষ্ঠ পুত্ৰ ট্ৰাম্প জুনিয়ৰ আৰু তেওঁৰ জীয়ৰী ইভাঙ্কা ট্ৰাম্পক নিউয়ৰ্কৰ এখন আদালতে তলব কৰিছে। নিউয়ৰ্ক আদালতৰ এটৰ্নী জেনেৰেল লেটিটিয়া জেমছে ট্ৰাম্পৰ দুই সন্তানক ব্যৱসায়িক নথি-পত্ৰৰ অনুসন্ধানৰ বাবে তলব কৰা বুলি জানিবলৈ পোৱা গৈছে। সোমবাৰে আমেৰিকা যুক্তৰাষ্ট্ৰৰ সংবাদ মাধ্যমে প্ৰাক্তন ৰাষ্ট্ৰপতি গৰাকীৰ দুই সন্তানক আদালতত হাজিৰ হোৱাৰ নিৰ্দেশ দিয়াৰ কথা প্ৰকাশ কৰিছিল।

ইয়াৰপূৰ্বেও, আদালতে ট্ৰাম্পৰ সন্তানৰ সম্পত্তিৰ তথ্য বিচাৰি তেওঁলোকক একাধিকবাৰ তলব কৰিছিল। কিন্তু নিৰ্দেশ অনুসৰি আদালতত হাজিৰ হোৱা নাছিল ট্ৰাম্প জুনিয়ৰ আৰু ইভাঙ্কা। এইবাৰো ট্ৰাম্প জুনিয়ৰ আৰু ইভাঙ্কা ট্ৰাম্পে আদালতত হাজিৰ নোহোৱাৰে সম্ভাৱনা অধিক ঘণীভূত হৈ পৰিছে। লক্ষণীয়ভাৱে, কৰ ফাঁকি দিয়াৰ উদ্দেশ্যে সম্পত্তিৰ ভুল তথ্য প্ৰেৰণ কৰা বুলি ট্ৰাম্প সন্তানৰ বিৰুদ্ধে আছে দীৰ্ঘদিনীয়া অভিযোগ।