ডিজিটেল ডেস্কঃ ঈদ-উল-ফিটৰ ইছলাম ধৰ্মাৱলম্বীসকলৰ ডাঙৰ ধৰ্মীয় উৎসৱ। দীৰ্ঘ এমাহ ৰোজা ৰখাৰ পাছত মুছলিমসকলে এই দিনটোত ধৰ্মীয় কৰ্তব্যসমূহ খুব আনন্দৰ সৈতে পালন কৰা দেখা যায়।
ৰমজান মাহৰ এমাহ ব্যাপী কঠোৰ ৰোজাব্ৰত বা উপবাসৰ অন্তত কাইলৈ ইছলাম ধৰ্মালম্বী লোকসকলে পালন কৰিব ঈদ-উল-ফিটৰ। ছৌদি আৰৱত দেখা গ’ল ঈদৰ জোন।
আৰু ইয়াৰ পিছতেই কাইলৈ অৰ্থাৎ শনিবাৰে সমগ্ৰ দেশতেই পালন কৰা হ’ব ঈদ। আজি ছৌদি আৰৱত পালন কৰা হ’ব ঈদ-উল-ফিটৰ। ঈদ-উল-ফিটৰক লৈ ব্যাপক আয়োজন কৰা হৈছে ছৌদি আৰৱত।
ঈদৰ বাবে ছৌদি আৰৱত ২১ হাজাৰ মছজিদত একেলগে নামাজ আদায় কৰিছে ইছলাম ধৰ্মী লোকসকলে।
উল্লেখ্য যে চন্দ্ৰ পঞ্জিকাৰ ওপৰত ভিত্তি কৰি ঈদৰ দিন ধাৰ্য কৰা হয়। এটা শুক্ল প্ৰতিপদৰ পৰা তাৰ পিছৰ অমাৱস্যালৈকে সময়ছোৱাই হ'ল চন্দ্ৰ মাহ। এই হিচাপ মতে ৰমজান মাহৰ অন্তত শ্বাওয়াল বা ছাৱাল মাহৰ নতুনদিনে দেখা দিয়াৰ পিছদিনা ঈদ উৎসৱ পালন কৰা হয়।
মুছলমানসকলৰ বিশ্বাস মতে ৰমজান মাহ পবিত্ৰ মাহ। এই মাহৰ শেষৰ সপ্তাহত হিৰা পৰ্বতৰ গুহাত ধ্যান কৰি থকা অৱস্থাত হজৰত মহম্মদে আল্লাৰ বাণী শুনিবলৈ পাইছিল। সেই বাণীয়েই হ'ল কোৰানশ্বৰীফ। সেয়ে এই পবিত্ৰ মাহত মুছলমান সকলে ৰোজা বা উপবাস পালন কৰিলে শুভ হয় বুলি বিশ্বাস কৰে।
Continue Reading
