ডিজিটেল ডেস্কঃ ভাৰতীয় দলৰ প্ৰাক্তন অধিনায়ক মহেন্দ্ৰ সিং ধোনিৰ বিৰুদ্ধে বিচিচিআইত দাখিল কৰা হৈছে এজাহাৰ । বিচিচিআইৰ নৈতিকতা সমিতিত মহেন্দ্ৰ সিং ধোনিৰ বিৰুদ্ধে অভিযোগ পত্ৰ দাখিল কৰিছে ইউ পিৰ আমেথি নিৱাসী ৰাজেশ কুমাৰ মৌৰ্যই। বিচিচিআইৰ ৩৯নং নিয়মৰ অধীনত মহেন্দ্ৰ সিং ধোনিৰ বিৰুদ্ধে এই অভিযোগ উত্থাপন হৈছে।
উল্লেখ্য যে বিচিচিআইত কৰা এই অভিযোগ ৰাঁচী অসামৰিক আদালতত মহেন্দ্ৰ সিং ধোনিয়ে মিহিৰ দিৱাকাৰৰ বিৰুদ্ধে ১৫ কোটি টকাৰ জালিয়াতিৰ গোচৰৰ সৈতে জড়িত। বিচিচিআইৰ নৈতিকতা সমিতিয়ে এই বিষয়ত মহেন্দ্ৰ সিং ধোনিৰ পৰা অহা ৩০ আগষ্টৰ ভিতৰত উত্তৰ বিচাৰিছে। আনহাতে, ৰাজেশ কুমাৰ মৌৰ্যক এই বিষয়ত ১৬ ছেপ্টেম্বৰৰ ভিতৰত উত্তৰ দিবলৈ কোৱা হৈছে।
এই গোচৰটো মহেন্দ্ৰ সিং ধোনীৰ সৈতে থকা প্ৰাক্তন ক্ৰিকেটাৰ মিহিৰ দিৱাকাৰ, সৌম্য দাস আৰু আৰ্কা স্প’ৰ্টছ মেনেজমেণ্ট প্ৰাইভেট লিমিটেডৰ বিৰুদ্ধে প্ৰৱঞ্চনাৰ অভিযোগ উত্থাপন হয়। এই বিষয়ত ২০২৪ চনৰ ২০ মাৰ্চত আদালতে এটা গুৰুত্বপূৰ্ণ সিদ্ধান্ত লৈছিল।এই সিদ্ধান্তত ৰাঁচী আদালতে গোচৰটোক স্বতঃস্ফূৰ্তভাৱে শুদ্ধ বুলি বিবেচনা কৰে। ইয়াৰ পিছতে আদালতে এই গোচৰত মিহিৰ দিৱাকাৰ, সৌম্য দাস আৰু আৰ্কা স্প’ৰ্টছ মেনেজমেণ্ট প্ৰাইভেট লিমিটেডৰ বিৰুদ্ধে চমন জাৰি কৰাৰ নিৰ্দেশনা দিয়ে। দৰাচলতে ভাৰতীয় দলৰ প্ৰাক্তন অধিনায়ক মহেন্দ্ৰ সিং ধোনিৰ হৈ ৰাঁচী অসামৰিক আদালতত তেওঁৰ প্ৰাক্তন ব্যৱসায়িক সহযোগী মিহিৰ দিৱাকাৰৰ বিৰুদ্ধে অপৰাধমূলক গোচৰ ৰুজু কৰা হৈছে। য’ত ধোনিৰ হৈ কোৱা হৈছে যে মিহিৰ দিৱাকাৰে চুক্তিৰ চৰ্ত উলংঘা কৰিছে। লগতে ২০২১ চনত চুক্তি বাতিল হোৱাৰ পিছতো ধোনিৰ নাম ব্যৱহাৰ কৰি আহিছে মিহিৰ দিৱাকাৰৰ কোম্পানী আৰ্কা স্প’ৰ্টছ মেনেজমেণ্ট লিমিটেডে। ধোনিৰ অধিবক্তা দয়ানন্দ সিঙে কয় যে এই কোম্পানীয়ে দেশৰ বিভিন্ন ঠাইত একাডেমী খুলিছে। কিন্তু চৰ্ত অনুসৰি ধোনিৰ সৈতে কোনো ধৰণৰ লাভ ভাগ কৰা হোৱা নাই।
এই সমগ্ৰ চুক্তিৰ চৰ্ত উলংঘাৰ বাবে ধোনিৰ প্ৰায় ১৫ কোটি টকাৰ লোকচান হয়। ধোনীৰ অধিবক্তাই পূর্বে ছ’চিয়েল মিডিয়াত মিহিৰ দিৱাকাৰে শ্বেয়াৰ কৰা মতামতৰো প্ৰতিক্ৰিয়া প্ৰকাশ কৰে৷ আপোনালোকক জনাওঁ যে আনটো পক্ষ মিহিৰ দিৱাকাৰৰ হৈ মহেন্দ্ৰ সিং ধোনিৰ বিৰুদ্ধেও ১ ফেব্ৰুৱাৰীত কানপুৰ আদালতত গোচৰ ৰুজু কৰা হৈছে। এতিয়া মহেন্দ্ৰ সিং ধোনীয়ে ৩০ আগষ্টৰ পূৰ্বে এই সন্দৰ্ভত বিচিচিআইক উত্তৰ দিব লাগিব।
