কালৰ কৰাল গ্ৰাসত মহাৰাষ্ট্ৰ , মুম্বাই; স্তব্ধ হৈ পৰিছে স্বাভাৱিক জনজীৱন

নতুন দিল্লীঃ দেশত ক’ভিডৰ দৈনিক সংক্ৰমণে তীব্ৰ ৰূপ ধাৰণ কৰিছে। দৈনিক সংক্ৰমণৰ হাৰ বৃদ্ধি পাইছে মহাৰাষ্ট্ৰত। মহাৰাষ্ট্ৰত ক’ভিড ৰোগীৰ সংখ্যা এদিনত প্ৰায় ৫১ শতাংশলৈ বৃদ্ধি পাইছে। সোমবাৰে মহাৰাষ্ট্ৰত ক’ভিড আক্ৰান্তৰ সংখ্যা আছিল ১২,১৬০ জন। বিপৰীতে মঙলবাৰে আক্ৰান্তৰ সংখ্যা ১৮,৪৬৬ জনলৈ বৃদ্ধি পোৱা পৰিলক্ষিত হৈছে। মহাৰাষ্ট্ৰৰ সমান্তৰালকৈ মুম্বাই চহৰতো সোমবাৰৰ তুলনাত মঙলবাৰে সংক্ৰমিতৰ হাৰ ৩৪ শতাংশলৈ বৃদ্ধি পোৱা বুলি জানিবলৈ পোৱা গৈছে।

মঙলবাৰে মুম্বাইত মুঠ আক্ৰান্তৰ সংখ্যা আছিল ১০,৮৬০ জন। আক্ৰান্ত ব্যক্তিসকলৰ ৮৯ শতাংশই লক্ষণহীন বুলিও সদৰি কৰিছে প্ৰশাসনে। একে সময়তে, বিগত ২৪ ঘণ্টাত মহাৰাষ্ট্ৰত ২০ জন ক’ভিড ৰোগীৰ মৃত্যুৰ খবৰেও উদ্বিগ্ন কৰি তুলিছে দেশবাসীক। ইফালে নতুনকৈ ক’ভিডত আক্ৰান্ত হোৱাসকলৰ ৮৩৪ জনক চিকিৎসালয়ত ভৰ্তি কৰিব লগা হৈছিল আৰু ইয়াৰে ৫২ জন ৰোগীক অক্সিজেনৰ প্ৰয়োজন হৈছিল বুলি সংবাদ মাধ্যমত প্ৰকাশ পাইছে। মুম্বাইকে ধৰি মহাৰাষ্ট্ৰৰ মুখ্য চহৰসমূহত ক’ভিড আক্ৰান্তৰ সংখ্যা বৃদ্ধিৰ বাবে অ’মিক্ৰনকে দোষাৰোপ কৰিছে বিশেষজ্ঞসকলে। বিগত ২৪ ঘণ্টাত, মহাৰাষ্ট্ৰত ৭০ জন লোক নতুনকৈ অ’মিক্ৰনত আক্ৰান্ত হৈছে। উল্লেখ্য যে, মহাৰাষ্ট্ৰত এতিয়ালৈকে অ’মিক্ৰন আক্ৰান্ত ৰোগীৰ সংখ্যা ৬৫৩। মুম্বাইত ৪০৮ জন আৰু পুনেত ৭১ জন ।