চীনেই ভাৰতৰ কণাৰ লাখুঁটি! নিৰ্বাচনী ইস্তাহাৰতে সীমাবদ্ধ মোদীৰ আত্মনিৰ্ভৰ ভাৰতৰ শ্ল’গান

ডিজিটেল ডেস্কঃ ভাৰতৰে চীনৰ সম্পৰ্কৰ কথা দুনাই দোহৰাৰ কোনো প্ৰয়োজন নাই নিশ্চয়। সময়ে সময়ে সীমান্তৰ পৰা নানা প্ৰতিকূল খবৰে সংবাদ শিৰোনাম দখল কৰা দেখিবলৈ পোৱা যায়। অলপতে চীনা সৈন্যক ৰঙা চকু দেখুৱাই ভাৰতীয় সেনাবাহিনীয়ে লাডাখত ত্ৰিৰংগ পতাকা উত্তোলন কৰাও পৰিলক্ষিত হৈছিল। এনে ভাললগা কিছুমান খবৰৰ বিপৰীতে কেতবোৰ নেতিবাচক খবৰে উদ্বিগ্ন কৰি তোলে সচেতন মহলক। দিনদিয়েক আগেয়ে অসমৰ বাঁহেৰেই ধূপ কাঠী নিৰ্মাণৰ ক্ষেত্ৰত চীন আৰু ভিয়েটনামে কেনেধৰণে অৰ্থনৈতিক বজাৰখন দখল কৰিছে সেয়া সংবাদ মাধ্যমত প্ৰকাশ পাইছিল। শেহতীয়াকৈ দৰব প্ৰস্তুতৰ ক্ষেত্ৰত ভাৰতৰ পয়ালগা অৱস্থাৰ কথা পোহৰলৈ আহিছে।

দৰব প্ৰস্তুতৰ ক্ষেত্ৰত এতিয়াও চীনৰ ওপৰত নিৰ্ভৰশীল ভাৰত। উল্লেখ্য যে, বৰ্তমান শাসনাধিষ্ঠ বিজেপি চৰকাৰখনৰ নিৰ্বাচনী ইস্তাহাৰত স্থান পোৱা এজেণ্ডা সমূহৰ ভিতৰত আত্মনিৰ্ভৰশীল ভাৰতৰ শ্ল’গানো আছিল অন্যতম। পাছে আত্মনিৰ্ভৰশীল ভাৰতৰ শ্ল’গান দি অহা নৰেন্দ্ৰ মোদী চৰকাৰখনৰ কথা আৰু কামৰ মাজত বৃহত্‍ অমিল দেখিবলৈ পাইছে জনসাধাৰণে। চৰকাৰী তথ্য অনুসৰি জ্বৰ-চৰ্দি, কাহৰ পৰা আৰম্ভ কৰি কেন্সাৰৰ দৰব প্ৰস্তুতৰ বাবে প্ৰতিৱেশী চীনেই ভাৰতৰ একমাত্ৰ ভৰসা। প্ৰকাশিত প্ৰতিবেদন অনুসৰি, ক’ভিডসৃষ্ট পৰিৱেশৰ মাজতে চীনৰ পৰা ভাৰতে প্ৰায় ১৯ হেজাৰ ৪০০ কোটি টকাৰ দৰব প্ৰস্তুতৰ বাবে প্ৰয়োজনীয় ৰাসায়নিক দ্ৰব্য আমদানি কৰিছে।

পূৰ্বৰ তুলনাত দৰবৰ আমদানিও ১৯ শতাংশলৈ বৃদ্ধি পাইছে। ২০১৯-২০ত দেশত দৰব প্ৰস্তুতৰ বাবে আমদানি কৰা ৰাসায়নিক দ্ৰব্যৰ পৰিমাণ ৩৬,৪৪৩ কোটি টন আৰু ইয়াৰ মূল্য ২৪,১৭১ কোটি টকা। ইয়াৰে ভিতৰত চীনৰ পৰা আমদানি কৰা সামগ্ৰীৰ মূল্য হৈছে ১৬,৪৪৩ কোটি টন। ২০২০-২১ত আমদানিকৃত মুঠ ৩৯,০৪৭ কোটি টন সামগ্ৰীৰ মুঠ মূল্য হৈছে ২৮,৫২৯ কোটি টকা। ইয়াৰে ভিতৰত চীনৰ পৰা অনা হয় ১৯,৪০৩ কোটি টকাৰ সামগ্ৰী। শেহতীয়াকৈ কেন্দ্ৰীয় বাণিজ্য আৰু উদ্যোগ মন্ত্ৰণালয়ে এই তথ্য প্ৰকাশ কৰিছে।