কামৰূপত খহনীয়াৰ বিভীষিকাৰ মাজতে অৱ্যৱহৃত জিও-বেগে সৃষ্টি কৰিছে বিতৰ্ক

পলাসবাৰী, ৩১ জুলাই: ব্ৰহ্মপুত্ৰৰ ভয়াৱহ খহনীয়াই ৰাজ্যৰ কেইবাখনো অঞ্চলত ব্যাপক ক্ষতিসাধন কৰি থকাৰ সময়তে কামৰূপ জিলাৰ পলাসবাৰী বিধানসভা সমষ্টিৰ অন্তৰ্গত শিমিনা চ’কৰ সমীপৱৰ্তী চূলিকাটাত থকা জলসম্পদ বিভাগৰ পৰিদৰ্শন বঙলাৰ চৌহদত হাজাৰ হাজাৰ জিও-বেগ অৱ্যৱহৃত অৱস্থাত পৰি আছে। মথাউৰি নিৰ্মাণ আৰু খহনীয়া প্ৰতিৰোধৰ বাবে ব্যৱহৃত এই গুৰুত্বপূৰ্ণ সামগ্ৰীসমূহ দীৰ্ঘদিন ধৰি এনেদৰে পৰি থকা ঘটনাই অঞ্চলটোত তীব্ৰ প্ৰতিক্ৰিয়াৰ সৃষ্টি কৰিছে।

স্থানীয় ৰাইজৰ অভিযোগ অনুসৰি, এই জিও-বেগ আৰু অন্যান্য খহনীয়া প্ৰতিৰোধক সামগ্ৰীসমূহ প্ৰায় দুটাৰ পৰা তিনিটা বছৰ ধৰি মুকলি ঠাইতে পেলাই থোৱা হৈছে। এই সামগ্ৰীসমূহ ব্যৱহাৰৰ বাবে কোনো ধৰণৰ পৰিকল্পনা কৰা হোৱা নাই বুলিও তেওঁলোকে অভিযোগ কৰে। মুকলি ঠাইত পৰি থকাৰ ফলত এই জিও-বেগসমূহৰ চাৰিওফালে বন-জংঘল গজি উঠিছে, যাৰ ফলত কোটি কোটি টকাৰ সামগ্ৰী নষ্ট হোৱাৰ সম্ভাৱনাই দেখা দিছে।

বিশেষকৈ শিমিনা, গুইমাৰা আৰু গুমিত ব্ৰহ্মপুত্ৰৰ খহনীয়াই প্ৰতিদিনে নতুন নতুন অঞ্চল গ্ৰাস কৰি থকাৰ সময়তে এনেদৰে গুৰুত্বপূৰ্ণ সামগ্ৰীসমূহ অৱ্যৱহৃত অৱস্থাত পৰি থকা ঘটনাই ৰাইজৰ মাজত ক্ষোভৰ সৃষ্টি কৰিছে। স্থানীয় লোকে প্ৰশ্ন কৰিছে যে, খহনীয়াই ভয়ংকৰ ৰূপ ধাৰণ কৰাৰ পিছতো জলসম্পদ বিভাগে কিয় এই সামগ্ৰীসমূহ ব্যৱহাৰ কৰিবলৈ সক্ষম হোৱা নাই।

ৰাইজে অভিযোগ কৰিছে যে, জিও-বেগসমূহ দীৰ্ঘদিন ধৰি এনেদৰে মজুত কৰি ৰখাটোৱে বিভাগৰ দুৰ্বল পৰিকল্পনা আৰু ব্যৱস্থাপনাৰ অভাৱকে প্ৰতিফলিত কৰিছে। চৰকাৰে খহনীয়া প্ৰতিৰোধৰ বাবে বিভিন্ন মহত্বাকাংক্ষী আঁচনি হাতত লোৱাৰ কথা ঘোষণা কৰি থকাৰ সময়তে এনেদৰে গুৰুত্বপূৰ্ণ সামগ্ৰীসমূহৰ অপচয় হোৱাটো দুৰ্ভাগ্যজনক বুলিও তেওঁলোকে মন্তব্য কৰে। এই বিষয়ে শীঘ্ৰেই চৰকাৰ আৰু বিভাগীয় কৰ্তৃপক্ষই গুৰুত্ব সহকাৰে বিবেচনা কৰি ব্যৱস্থা গ্ৰহণ কৰিবলৈ দাবী জনাইছে স্থানীয় ৰাইজে।