কাশ্মীৰক পাকিস্তানৰ পৰা আৰু মানস সৰোৱৰক চীনৰ দখলৰ পৰা ঘূৰাই পাবলৈ দেশবাসীয়ে প্ৰতি পুৱা প্ৰাৰ্থনা কৰকঃ আৰএছএছ নেতা

ডিজিটেল ডেস্কঃ পাকিস্তান অধিকৃত কাশ্মীৰ আৰু কৈলাশ মানস সৰোৱৰক ভাৰতে ঘূৰাই পাবলৈ দেশবাসীয়ে প্ৰতি পুৱা বিশেষভাৱে প্ৰাৰ্থনা কৰা উচিত। শনিবাৰে এইদৰে মন্তব্য কৰিছে আৰএছএছ নেতা ইন্দ্ৰেশ কুমাৰে।

কুমাৰে কয় যে মানস সৰোবৰক চীন আৰু কাশ্মীৰক পাকিস্তানে অবৈধভাৱে দখল কৰি আছে। নিজৰ বক্তব্যত কুমাৰে জম্মু কাশ্মীৰত যোৱা ৭০ বছৰে শাসনত বহি অহা আঞ্চলিক দলসমূহকো সমালোচনা কৰে।

“কৈলাশ মানসসৰোবৰ ভাৰতৰ অংশ আছিল। এতিয়া চীনে ইয়াক অবৈধভাৱে দখল কৰি আছে। ইয়াক ভাৰতৰ লগত পুনৰ চামিল কৰা উচিত আৰু দেশবাসীয়ে এতিয়াও বিশ্বাস কৰে যে ভৱিষ্যতে এয়া সম্ভৱ হৈ উঠিব।”- কুমাৰে কয়।

“আমি দেশবাসীক অনুৰোধ কৰিছো যে প্ৰতিপুৱা তেওঁলোকে কৈলাশ মানস সৰোৱৰ আৰু পাকিস্তান অধিকৃত কাশ্মীৰ পুনৰাই লাভ কৰিবলৈ পাৰ্থনা কৰে।’’- কুমাৰে কয়- “প্ৰাৰ্থনাৰ অপৰিসীম শক্তি আছে।”

তদুপৰি মোদী চৰকাৰক প্ৰশংসা কৰি তেওঁ কয় যে দেশবাসীৰ নৰেন্দ্ৰ মোদীৰ ওপৰত আস্থা থকা উচিত। চীনৰ আগ্ৰাসনৰ প্ৰতি মোদী চৰকাৰে গ্ৰহণ নীতিসমূহক সমৰ্থন জনাবলৈও তেওঁ আহ্বান কৰে।

পাকিস্তানৰ প্ৰতিও ক্ষোভৰ বহিঃপ্ৰকাশ ঘটায় কুমাৰে। কয় যে পাকিস্তানে দেশখনৰ সংখ্যালঘু হিন্দুসকলৰ ওপৰত ব্যাপক হিংসা চলাই আহিছে।