অনুমতি অবিহনে ‘ভাৰত জুড়ো যাত্ৰা’ত কেজিএফ-২ৰ গান! গোচৰ ৰুজু ৰাহুল গান্ধীৰ বিৰুদ্ধে

ডিজিটেল ডেস্কঃ ভাৰত জোড়ো যাত্ৰাৰ মাজতে ৰাহুল গান্ধীৰ বিৰুদ্ধে এটা গোচৰ ৰুজু কৰা হৈছে। জনপ্ৰিয় কান্নাড়া ছৱি কেজিএফ-২ৰ এটা গান অনুমতি নোলোৱাকৈ গান্ধীৰ যাত্ৰাটোত ব্যৱহাৰ কৰাৰ বাবে এই গোচৰ ৰুজু কৰা হৈছে।

ৰাহুল গান্ধীৰ উপৰিও আন দুজন জ্যেষ্ঠ কংগ্ৰেছ নেতাকো গোচৰটোত সাঙুৰি লোৱা হৈছে। নেতাকেইজন হৈছে- জয়ৰাম ৰমেশ আৰু সুপ্ৰিয়া।

যশোৱন্তপুৰ আৰক্ষী থানাত শুক্ৰবাৰে ৰুজু হোৱা গোচৰটো কপিৰাইট আইন, ইনফৰমেচন টেকন’লজী এক্ট আৰু ভাৰতীয় দণ্ডবিধিৰ ধাৰাৰ অধীনত তৰা হৈছে। এমআৰটি মিউজিকৰ মেনেজাৰ এম নৱীন কুমাৰে গোচৰটো তৰিছে বুলি জানিব পৰা গৈছে।

এজাহাৰত কুমাৰে কয় যে কেজিএফ-২ৰ উক্ত গানটোৰ স্বত্ব তেওঁৰ সংস্থাটোত আছে আৰু ইয়াক ভাৰত জোড়ো যাত্ৰাত অনুমতি নোলোৱাকৈ ব্যৱহাৰ কৰা হৈছে।

উল্লেখ্য যে যোৱা ৭ ছেপ্টেম্বৰত আৰম্ভ কৰা যাত্ৰাটোৱে ইতিমধ্যে দক্ষিণ ভাৰত আটাইকেওখন ৰাজ্য সামৰি লৈছে। যাত্ৰাটোৰ মাজতে ৰাহুল গান্ধীৰ বিৰুদ্ধে এইদৰে গোচৰ ৰুজু হোৱাো লক্ষ্যণীয় হৈ পৰিছে।