ডিজিটেল ডেস্কঃ মঙলবাৰে পুৱাই এক ভয়ংকৰ দুৰ্ঘটনাই কঁপাই গ’ল জম্মু আৰু কাশ্মীৰক। আজি পুৱা বৈষ্ণো দেৱী মন্দিৰলৈ গৈ থকা এখন বাছ দ’ খাদত বাগৰি পৰাৰ ফলত কমেও ১০ জন ভক্ত নিহত হয়।
দুৰ্ঘটনাটোত কমেও ১২ গৰাকী ভক্ত আহত হৈছে। আহতসকলক ততাতৈয়াকৈ এখন স্থানীয় চিকিৎসালয়ত ভৰ্তি কৰোৱা হৈছে। মঙলবাৰে জম্মু-শ্ৰীনগৰ ৰাষ্ট্ৰীয় ঘাইপথৰ ওচৰৰ এটা খাৱৈত পৰ্যটক কঢ়িয়াই নিয়া বাছ খনে নিয়ন্ত্ৰণ হেৰুৱাই বাগৰি পৰে। কাটৰাৰ পৰা বাছ খনে যাত্ৰা কৰিছিল।আহতসকলৰ ভিতৰৰে বহু কেইগৰাকী লোকৰ অৱস্থা সংকটজনক হোৱালৈ চাই নিহতৰ সংখ্যা বৃদ্ধি পোৱাৰ আশংকা কৰা হৈছে।
জম্মুৰ উপায়ুক্ত অৱনী লাভাছাই কয় যে কাটৰাৰ পৰা ১৫ কিলোমিটাৰ দূৰৈত অৱস্থিত ঝাজ্জৰ কোটলীৰ ৰাষ্ট্ৰীয় ঘাইপথৰ ওচৰত যাত্ৰীবাহী বাছখন গভীৰ খাৱৈত পৰি যায়। লাভাছাই লগতে কয় যে উদ্ধাৰ অভিযান পূৰ্ণ গতিত চলি আছে। চিআৰপিএফৰ কমাণ্ডেণ্ট অশোক চৌধুৰীয়ে কয় যে উদ্ধাৰ অভিযান চলি আছে আৰু আহতসকলক উদ্ধাৰ কৰি চিকিৎসালয়লৈ প্ৰেৰণ কৰা হৈছে।
উল্লেখ্য উক্ত অঞ্চলটোত পূৰ্বেও এনে ধৰণৰ দুৰ্ঘটনা সংঘটিত হৈছিল। যোৱা বছৰৰ ছেপ্টেম্বৰ মাহতো সেই স্থানতে এখন যাত্ৰীবাহী বাহন খাদত পৰি গৈছিল। বিগত বৰ্ষৰ আগষ্ট মাহত পহেলগাওঁত নিৰাপত্তাবাহিনীৰ এখন বাছ গভীৰ খাদত পৰি যোৱাৰ ফলত আইটিবিপিৰ সাতজন কৰ্মী নিহত হৈছিল।
Continue Reading
