ডিজিটেল ডেস্কঃ আণ্ডাৰডগ মৰক্কোৰ হাতত পৰাজীত হ’ল তাৰকাখচিত বেলজিয়াম। বিশ্বকাপৰ গ্ৰুপ-এফৰ এখন গুৰুত্বপূৰ্ণ মেচত উল্লেখনীয় প্ৰদৰ্শন আগবঢ়াবলৈ সক্ষম নহ’ল কেভিন ডি ব্ৰুইন, এডিন হাজাৰ্ড অথবা থৰগেন হাজাৰ্দ।
আচ্ৰাফ হাকিমি, হাকিম জীয়েখৰ দৰে কেইজনমান শীৰ্ষস্থানীয় তাৰকাক লৈ গঠিত মৰক্কোৰ আক্ৰমণৰ আগত হাৰ মানে বেলজিয়ামে। আল থুমামা ষ্টেডিয়ামত অনুষ্ঠিত হোৱা মেচখনত মৰক্কোৰ আগত ২-০ ব্যৱধানত পৰাস্ত হয় বেলজিয়াম।
মৰক্কোৰ হৈ প্ৰথমটো গ’লটো কৰে আক্ৰমণাত্মক মিডফিল্ডাৰ আব্দেলহামিদ ছাবিৰিয়ে। ৭৩ মিনিটত ছাবিৰৰ এটা দূৰ্দান্ত ফ্ৰী কিকৰ ওচৰত হাৰ মানে বেলজিয়ামৰ তাৰকা গ’লকীপাৰ থিব’ কুৰ্তোৱা।
দ্বিতীয়াৰ্ধৰ অতিৰিক্ত সময়ত আনটো গ’ল কৰে মৰক্কোৰ ফৰৱাৰ্ড জাকাৰিয়া আব’খলালে। আব’খলালৰ দূৰ্দান্ত গ’লটোৱে বেলজিয়ামৰ সকলো সম্ভাৱনা তচনচ কৰি পেলায়।
বেলজিয়ামৰ পৰাজয়ৰ মূলতে আছিল দলটোৰ আক্ৰমণশৈলীত দেখা দিয়া বিভিন্ন ত্ৰুটি। ৬৭ শতাংশ বলৰ আয়ত্ত থাকিলেও দলটোৱে কোনো বিশেষ আক্ৰমণ কৰিবলৈ সক্ষম নহ’ল।
এই বিজয়ৰ দ্বাৰা মৰক্কোৱে গ্ৰুপ এফৰ শীৰ্ষস্থানত উপনীত হোৱাৰ বিপৰীতে বেলজিয়ামে দ্বিতীয় স্থান অটুত ৰাখিছে। গ্ৰুপৰ পৰৱৰ্তী মেচ কানাডা আৰু ক্ৰৱেচিয়াৰ মাজত অনুষ্ঠিত হ’ব।
Continue Reading
