ডিজিটেল ডেস্কঃ দেশৰ ৰাজধানী দিল্লীৰ পৰা আহি পৰিছে এক গুৰুত্বপূৰ্ণ খবৰ৷এজন কেব চালকে নতুন দিল্লীৰ কেন্দ্ৰীয় মন্ত্ৰী কিৰেণ ৰিজিজুৰ চৰকাৰী বাসগৃহৰ বেৰত খুন্দা মাৰি বেৰৰ এটা অংশ ভাঙি পেলায়। এই ঘটনাৰ পাছত আৰক্ষীয়ে কেব চালকজনক আটক কৰে, আৰু পৰৱৰ্তী সময়ত চোৰাংচোৱা সংস্থাই দীঘলীয়া জেৰা কৰি চালকজনক মুকলি কৰি দিয়ে।
উল্লেখযোগ্য যে,কিৰেণ ৰিজিজু দিল্লীৰ কৃষ্ণ মেনন মাৰ্গত অৱস্থিত চৰকাৰী বাংলোত থাকে। বুধবাৰে তীব্ৰবেগী কেব এখন তেওঁৰ বাংলোৰ বেৰত খুন্দা মৰাৰ ফলত দেৱালৰ এটা অংশ ভাঙি যায়। লাভ কৰা তথ্য অনুসৰি কেব চালক ৰহিম খান নুহৰ বাসিন্দা। তেওঁ কয় যে এখন বাছে তেওঁৰ কেবৰ সৈতে সংঘৰ্ষত লিপ্ত হয়, যাৰ বাবে তেওঁ বেৰত খুন্দা মাৰে। স্মৰ্তব্য যে কেব চালক ৰহিম খান পৰিয়ালৰ সৈতে নুহলৈ গৈ আছিল।
কেব চালকজনে জেৰাৰ সময়ত কয় যে তেওঁ পৰিয়ালৰ সৈতে গাড়ীৰে নুহলৈ গৈ আছিল। ইফালে এখন বাছে তেওঁৰ গাড়ীৰ সৈতে খুন্দা মৰাৰ ফলত কেবখনে ৰিজিজুৰ ঘৰৰ বেৰত খুন্দা মাৰে। এই ঘটনাৰ বাবেই কেন্দ্ৰীয় মন্ত্ৰীগৰাকীৰ বাসগৃহত নিয়োজিত নিৰাপত্তাৰক্ষীৰ মাজত হুলস্থুলৰ সৃষ্টি হয়। অৱশ্যে এই দুৰ্ঘটনাত কোনো লোক আহত হোৱাৰ কোনো তথ্য পোৱা নাই।
Continue Reading
