ডিজিটেল ডেস্কঃ বিত্তীয় বৰ্ষ আৰম্ভ হোৱাৰ আগতেই চৰকাৰী কৰ্মচাৰী সন্দৰ্ভত মোদী চৰকাৰৰ এটা ডাঙৰ সিদ্ধান্ত । শুকুৰবাৰে কেন্দ্ৰীয় চৰকাৰে ২ শতাংশ ডি এ বৃদ্ধি কৰাৰ সিদ্ধান্ত গ্ৰহণ কৰিছে। অৰ্থাৎ এতিয়া ডি এ ৫৩ শতাংশৰ পৰা ৫৫ শতাংশলৈ বৃদ্ধি পাইছে, যাৰ ফলত লাখ লাখ কৰ্মচাৰীৰ দৰমহা বৃদ্ধি পাব।১ জানুৱাৰীৰ পৰাই কাৰ্যকৰী হ’ব এই বৰ্ধিত ভাট্টা ৷ শুকুৰবাৰে ৰে’ল মন্ত্ৰী অশ্বিনী বৈষ্ণৱে এই কথা ঘোষণা কৰে ৷
Dearness Allowance (DA) অৰ্থাৎ মুদ্ৰাস্ফীতিৰ প্ৰভাৱ কমোৱাৰ বাবে চৰকাৰী কৰ্মচাৰীক ডিয়াৰনেছ ভাট্টা দিয়া হয়। আচলতে মৌলিক দৰমহা পে কমিচনে প্ৰতি ১০ বছৰৰ মূৰে মূৰে নিৰ্ধাৰণ কৰে, কিন্তু ডি এ ৬ মাহৰ মূৰে মূৰে সলনি হয়, যাতে মুদ্ৰাস্ফীতিৰ প্ৰভাৱ কমি যায়। ২০২৪ চনৰ জুলাই মাহত ডি এ ৫০ শতাংশৰ পৰা ৫৩ শতাংশলৈ বৃদ্ধি কৰা হৈছিল।
কেন্দ্ৰীয় ৰে’ল আৰু তথ্য আৰু সম্প্ৰচাৰ মন্ত্ৰী অশ্বিনী বৈষ্ণৱে সংবাদমেলযোগে কেন্দ্ৰীয় চৰকাৰৰ কৰ্মচাৰীৰ বাবে DA ২ শতাংশ বৃদ্ধিৰ কথা ঘোষণা কৰে । তেওঁ কয় যে ইয়াৰ দ্বাৰা ৪৮.৬৬ লাখ কেন্দ্ৰীয় চৰকাৰৰ কৰ্মচাৰী আৰু ৬৬.৫৫ লাখ পেঞ্চনাৰ উপকৃত হ’ব ।
উল্লেখ্য যে চৰকাৰে ফেব্ৰুৱাৰী মাহৰ ৰাজ্যিক বাজেটত DR বৃদ্ধিৰ কথা ঘোষণা কৰিছিল । একেদৰে ২৫ মাৰ্চত ৰাজ্য চৰকাৰৰ কৰ্মচাৰীৰ DA বৃদ্ধিৰ সন্দৰ্ভত এক অধিসূচনা জাৰি কৰিছিল । নতুন গাইডলাইন অনুসৰি ১ এপ্ৰিলৰ পৰা ৰাজ্য চৰকাৰৰ কৰ্মচাৰীয়ে তেওঁলোকৰ মূল দৰমহাৰ ১৮ শতাংশ হাৰত DA লাভ কৰিব ।
কেন্দ্রীয় চৰকাৰৰ কর্মচাৰীসকলে তেওঁলোকৰ দৰমহাৰ ৫৫ শতাংশ DA হিচাপে লাভ কৰি আছে ৷ অৰ্থাৎ কেন্দ্ৰীয় চৰকাৰৰ কৰ্মচাৰীয়ে ৩৭ শতাংশ অধিক ভাট্টা লাভ কৰিছে । ৰাজ্য চৰকাৰৰ কৰ্মচাৰীয়ে কেন্দ্ৰীয় হাৰত DA নোপোৱাৰ বিৰুদ্ধে দীৰ্ঘদিন ধৰি আন্দোলন চলি আহিছে । এইবাৰ ৰাজ্য চৰকাৰৰ কর্মচাৰীসকল স্বাভাৱিকতে ক্ষুব্ধ হ’ব কাৰণ ভাট্টা দুটাৰ মাজত ব্যৱধান আৰু অধিক বৃদ্ধি পাইছে ৷
