ডিজিটেল ডেস্কঃ কেন্দ্ৰীয় গৃহমন্ত্ৰী অমিত শ্বাহৰ ঘৰত এডাল সাপে প্ৰৱেশ কৰাকলৈ আতংক বিয়পি পৰে। সাপডাল প্ৰথমে নিৰাপত্তাৰক্ষীসকলৰ দৃষ্টিত ধৰা পৰে। ইয়াৰ পিছতে বন বিভাগক লগে লগে অৱগত কৰা হয়। বন বিভাগৰ সূত্ৰই প্ৰকাশ কৰা মতে সাপডাল বিষাক্ত নহয়।
অমিত শ্বাহৰ ঘৰত সাপ প্ৰৱেশ কৰাত বহু লোক আচৰিত হৈছে। শ্বাহৰ নিৰাপত্তাৰ দায়িত্বত থকা বিষয়াএগৰাকীয়ে প্ৰকাশ কৰা গৃহমন্ত্ৰীৰ ঘৰৰ চৌহদত সাপডাল দেখা পোৱাৰ লগে লগে হুলস্থূলৰ সৃষ্টি হয়। এক মুহূৰ্তৰ পলম নকৰাকৈ খবৰটো বন বিভাগক জনোৱা হৈছিল। বন বিভাগৰ দুজন কৰ্মী আহি সাপডাল উদ্ধাৰ কৰে। পাঁচ ফুট দীঘল সাপডালৰ নাম হৈছে 'এছিয়াটিক ৱাটাৰ স্নেক' ।
সাপডাল নিৰাপত্তাৰক্ষীৰ কোঠাৰ ওচৰত এখন কাঠৰ তক্তাৰ তলত লুকাই আছিল। জানিব পৰা মতে এনে সাপ সাধাৰণতে পুখুৰী বা ডুবিৰ দৰে সৰু জলাশয়ত দেখা যায়। ১৯৭২ চনৰ বন্যপ্ৰাণী সুৰক্ষা আইনত এই প্ৰজাতিৰ সাপৰ সংৰক্ষণৰ ব্যৱস্থা কৰা হৈছে।
দিল্লীৰ দৰে জনবসতিপূৰ্ণ এলেকাত অৱস্থিত অমিত শ্বাহৰ বাসভৱনত সাপডালে কেনেকৈ সোমাল তাকে লৈ বহুতৰে মাজত আলোচনা চলিছে। দিল্লী প্ৰশাসনৰ এজন বিষয়াৰ মতে বাৰিষা ঋতুত দিল্লীত এয়া অস্বাভাৱিক ঘটনা নহয়। ইতিমধ্যে ৰাজধানীৰ বিভিন্ন অংশৰ পৰা এনে ৭০ ডাল সাপ উদ্ধাৰ কৰা হৈছে।
Continue Reading
