কেটৰিনাৰ বিয়াঃ লেহেংগা নে শাড়ী, কি পিন্ধিব ক্যাট সুন্দৰীয়ে?

নতুন দিল্লীঃ উথপথপ বলীউড! এখন বিবাহৰ বতৰাই ৰোমাঞ্চিত কৰিছে সকলোকে। মোহময়ী অভিনেত্ৰী কেটৰিনা কাইফ আৰু বিকি কৌশলৰ প্ৰেমৰ গুঞ্জন উঠিছে বলীউডত। জানিবলৈ পোৱা মতে, দীঘলীয়া সম্পৰ্কৰ পাছত এইবাৰ বিবাহপাশত আবদ্ধ হ’বলৈ গৈ আছে দুয়ো। সংবাদ মাধ্যমত প্ৰকাশ পোৱা অনুসৰি, চলিত বৰ্ষৰ ডিচেম্বৰত ৰাজস্থানত বিকি-কেটৰিনাৰ বিবাহ অনুষ্ঠান!

এক বিশেষ সূত্ৰৰ মতে, কেটৰিনাই ১৮ আগষ্টত বিকিৰ সৈতে সামাজিক মাধ্যমত ফটো প’ষ্ট কৰিছিল। এইবাৰ বিকি-কেটৰিনাই সম্পৰ্কৰ পৰৱৰ্তী পৰ্যায়লৈ অগ্ৰসৰ হৈছে। তেওঁলোকে সোনকালেই বিবাহপাশত আবদ্ধ হ’ব বুলিও গুজব উঠিছে। বিশেষ সূত্ৰৰ মতে, কেটৰিনা-বিকিয়েও বিয়াৰ বাবে প্ৰস্তুতি আৰম্ভ কৰিছে। তেওঁলোকৰ বিবাহৰ পোছাক ডিজাইন কৰি আছে সব্যসাচীয়ে। এতিয়াৰেপৰাই পোছাক বাছনি কৰিছে ক্যাট সুন্দৰীয়ে। ৰেচমৰ কাপোৰৰ লেহেংগাও হেনো বনাবলৈ দিছে কেটৰিনাই। বলীউডৰ এই হাইপ্ৰফাইল বিয়াখনৰ বাবে অধীৰ আগ্ৰহেৰে বাট চাইছে অনুৰাগীয়ে।

কিন্তু বিনোদনধৰ্মী সংবাদ মাধ্যম বলীউড লাইফে বুধবাৰে এক বিশেষ প্ৰতিবেদনত কেটৰিনা কাইফৰ ডিচেম্বৰৰ বিবাহৰ বাতৰি সঁচা নহয় বুলি দাবী কৰিছে। কেটৰিনা কাইফে কয়, ‘বাতৰিটো মিছা আৰু মই বিবাহপাশত আবদ্ধ হোৱাৰ কথা ভবা নাই।’ যদি কেটৰিনাৰ বিয়াৰ কথা মিছা তেনেহ’লে এই অপপ্ৰচাৰ কিয় বুলি সোধাত তেওঁ কয়, ‘এইটো কোনো নতুন কথা নহয়। ১৫ বছৰ ধৰি এই পৰিস্থিতিটোৰ সৈতে মোকাবিলা কৰি আহিছো।’