ডিজিটেল ডেস্কঃ নায়কৰ পৰা খলনায়কলৈ পৰিণত হ’ল সমীৰ ৱাংখেৰে। শ্বাহৰুখ খানৰ পুত্ৰ আৰিয়ান খানক ড্ৰাগছৰ গোচৰত গ্ৰেপ্তাৰ কৰাৰ পাছতে ৰাতিটোৰ ভিতৰতে নায়ক হৈ পৰিছিল আই আৰ এছ বিষয়াগৰাকী। কিন্তু এইগৰাকী বিষয়াৰ বিৰুদ্ধেই চিবিআইয়ে নতুনকৈ এটা গোচৰ ৰুজু কৰিছে।
আৰিয়ান খান ড্ৰাগছ গোচৰত শ্বাহৰুখৰ পৰা ২৫ কোটি টকা দাবী কৰা বুলি সমীৰ ৱাংখেড়েৰ বিৰুদ্ধে অভিযোগ উঠিছে। ২০২১ চনত প্ৰমোদতৰীত ৰেভ পাৰ্টিৰ পৰা আৰিয়ান খানক গ্ৰেপ্তাৰ কৰা হৈছিল। অভিযোগ উঠিছে যে সেই সময়ত সমীৰে আৰিয়ানক সহায় কৰাৰ নামত ২৫ কোটি টকা বিচাৰে। এই গোচৰত সমীৰৰ মুম্বাই, দিল্লী আৰু কানপুৰৰ ২৯টা ঘৰত তালাচী চলোৱাৰ পৰিকল্পনাও সন্মুখলৈ আনে। সমীৰৰ বাহিৰেও এই ঘটনাৰ সৈতে জড়িত এনচিবিৰ দুজন প্ৰাক্তন বিষয়া।
জানিব পৰা মতে, ইতিমধ্যে একাংশ বেচৰকাৰী কৰ্মীয়ে আৰিয়ানক সহায় কৰাৰ নামত ২৫ লাখ টকা লৈছে আৰু ঘোচ হিচাপে ২৫ কোটি টকা দাবী কৰিছিল। উল্লেখ্য যে সমীৰ ৱাংখেড়ে নাৰ্কটিকছ কন্ট্ৰ’ল ব্যুৰোৰ মুম্বাই জ’নৰ মুৰব্বী হিচাপে কাৰ্যনিৰ্বাহ কৰিছিল। আৰিয়ান খানক গ্ৰেপ্তাৰ হোৱাৰ পিছত তেওঁ শিৰোনামলৈ আহে।
শেহতীয়াকৈ এনচিবিৰ বিশেষ তদন্তকাৰী দলে আৰিয়ান খানৰ গোচৰৰ পুনৰ তদন্ত কৰি নতুনকৈ অভিযোগনামা দাখিল কৰে। সেই অভিযোগ পত্ৰৰ ভিত্তিত এন চি বিয়ে আৰিয়ান খানকে ধৰি সেই গোচৰত গ্ৰেপ্তাৰ হোৱা ১৪ জনৰ ভিতৰত ৬ জনক ক্লিনচিট দিছিল। প্ৰমাণৰ অভাৱত আৰিয়ানক দোষমুক্ত কৰা হৈছে বুলি নাৰ্কটিকছ কন্ট্ৰ’ল ব্যুৰ’ই জানিবলৈ দিয়ে।
Continue Reading
