খোজকাঢ়িয়েই ইউক্ৰেইন এৰিলে ভাৰতীয় ছাত্ৰই

ডিজিটেল ডেস্ক: ৰাছিয়াই ইউক্ৰেইনৰ ওপৰত যুদ্ধ ঘোষণা কৰাৰ পাছতেই আন্তঃৰাষ্ট্ৰীয় প্ৰেক্ষাপটত হাহাকাৰ পৰিস্থিতিৰ সৃষ্টি হৈছে। যিয়ে যেনেকৈ সক্ষম হৈছে, সেই মুহূৰ্ততেই ইউক্ৰেইন এৰি স্বদেশলৈ প্ৰত্যাৱৰ্তন কৰিছে বা সুৰক্ষিত স্থানলৈ গতি কৰিছে। ভাৰতৰ ১৫ সহস্ৰাধিক নাগৰিক দেশখনত আবদ্ধ হোৱাৰো খবৰ আহি পৰিছিল। ভাৰতীয় ছাত্ৰ-ছাত্ৰীসকলক স্বদেশলৈ ঘূৰাই আনিবলৈ চৰকাৰো তৎপৰ হৈ পৰা দেখা গৈছে। ইতিমধ্যে বহু সংখ্যক ছাত্ৰ-ছাত্ৰীক ঘূৰাই আনিবলৈ সক্ষম হৈছে যদিও অধিকাংশই দেশ খনত আবদ্ধ হৈ আছে। চৰকাৰৰ ফালৰ পৰা তেওঁলোকক গুগুলত চাৰ্চ কৰি সুৰক্ষিত স্থানত আশ্ৰয় ল’বলৈ আহ্বান জনাইছে। সংবাদ মাধ্যমত প্ৰকাশ পোৱা তথ্য অনুসৰি ৪০জন ভাৰতীয় শিক্ষাৰ্থীয়ে খোজ কাঢ়ি নিকটৱৰ্তী পোলেণ্ডৰ সীমাত উপস্থিত হৈছে। তেওঁলোকৰ মহাবিদ্যালয়ৰ বাছখন সীমান্তৰ পৰা ৮ কিলোমিটাৰ দূৰত পেলাই দিয়াৰ পাছত ইউক্ৰেইন-পোলেণ্ড সীমান্তলৈ খোজ কাঢ়ি গৈছিল বুলি সংবাদ মাধ্যত প্ৰকাশ পাইছে। ৰাছিয়াৰ আক্ৰমণৰ পাছত ইউক্ৰেইনৰ আকাশসীমা বন্ধ কৰা হৈছিল। যাৰ বাবে পোলেণ্ড সীমান্তৰ পৰা প্ৰায় ৭৫ কিলোমিটাৰ দূৰত থকা লভিভৰ ডেইনলো হালিটস্কি চিকিৎসা বিশ্ববিদ্যালয়ৰ শিক্ষাৰ্থীসকলে খোজকাঢ়ি পোলেণ্ডৰ দিশে গতি কৰিছিল। ৰাছিয়াৰ স্থল বাহিনীয়ে ইউক্ৰেইনৰ ৰাজধানী কিয়েভৰ ফালে ক্ৰমান্বয়ে আগবাঢ়িছে। বিশেষজ্ঞসকলে কেইঘণ্টামানৰ ভিতৰতে ৰাজধানী চহৰখন পতনৰ ভৱিষ্যদ্বাণী কৰিছে। বৈদেশিক সচিব হৰ্ষবৰ্ধন শ্ৰীংলাৰ মতে আকাশসীমা বন্ধ কৰাৰ আগতে ৪,০০০ লোকক স্থানান্তৰ কৰা হৈছিল। তাৰ পাছতো প্ৰায় ১৬,০০০ ভাৰতীয় এতিয়াও ইউক্ৰেইনত আবদ্ধ হৈ আছে। বৈদেশিক পৰিক্ৰমা মন্ত্ৰালয়ে কিয়েভৰ দূতাবাসৰ সৈতে যুদ্ধ বিধ্বস্ত দেশখনত নাগৰিকসকলক সুৰক্ষিতভাৱে ৰখাত সহায় কৰিবলৈ সময়ে সময়ে বিভিন্ন পৰামৰ্শ জাৰি কৰা, চব্বিশ ঘণ্টা হেল্পলাইন স্থাপন কৰা, অঞ্চলটোৰ বাহিৰত সুৰক্ষিত পথ চিনাক্ত কৰা আদি কামবোৰ নিৰন্তৰভাৱে কাম কৰি আহিছে। জানিব পৰা মতে দুখন বিশেষ বিমান আজি নিশা ইউক্ৰেইনলৈ উৰা মাৰিব আৰু কাইলৈ আবদ্ধ ভাৰতীয়সকলক লৈ স্বদেশলৈ উভতি আহিব। কেন্দ্ৰীয় চৰকাৰে এই অভিযানৰ সম্পূৰ্ণ খৰচ বহন কৰিব। ভাৰতীয়সকলক দেশৰ পশ্চিম অংশকে ধৰি সুৰক্ষিত স্থানলৈ যাত্ৰা কৰিবলৈ পৰামৰ্শ দিয়া হৈছে, যি কৰ্তৃপক্ষক পথ আৰু অন্যান্য উপায়েৰে প্ৰস্থান কৰাত সহায় কৰিব। যিসকল সংঘৰ্ষৰ ক্ষেত্ৰৰ ওচৰত আছে তেওঁলোকক গুগল মেপত নিকটতম বোমা আশ্ৰয় বিচাৰিবলৈ কোৱা হৈছে আৰু যদি বিমান আক্ৰমণৰ চাইৰেন বজোৱা হয় তেন্তে তালৈ যাবলৈ কোৱা হৈছে।