খোলা-মেলা পোছাক নিষেধ! মহিলাৰ পোছাকৰ জোখক লৈ ব্যস্ত হৈ পৰিছে ফিফা বিশ্বকাপৰ আয়োজক কাটাৰ

ডিজিটেল ডেস্কঃ কাটাৰ বিশ্বকাপত খোলা-মেলা পোছাক পৰিধান কৰিব নোৱাৰিব মহিলাসকলে৷ ইছলামিক ৰাষ্ট্ৰখনৰ আইন অনুসৰি ই নিষিদ্ধ৷ ফিফা বিশ্বকাপৰ প্ৰাকক্ষণত এই লৈ এতিয়া তীব্ৰ বিতৰ্ক চলা দেখা গৈছে৷

জানিব পৰামতে বিশ্বকাপ চাবলৈ অহা ভিন ভিন দেশৰ সমৰ্থকসকলে শৰীৰ ঢাকি ৰখা পোছাক পৰিধান কৰিব লাগিব৷ কোনো মহিলাই খোলামেলা পোছাক পৰিধান কৰিলে কঠোৰ পদক্ষেপ লোৱা হ’ব৷

সাধাৰণতে ফুটবল বিশ্বকাপসমূহত উন্মাদনা ভৰা পৰিৱেশ দেখা যায়৷ গেলেৰীত অলেখ দৰ্শনাৰ্থী থাকে৷ ফুটবলৰ উপৰিও মহিলা অনুৰাগীসকলৰ সৌন্দৰ্য, ফেশ্বনো ইয়াত প্ৰদৰ্শন হয়৷ কিন্তু এয়া কাটাৰত নিষিদ্ধ৷

মহিলাসকলে কান্ধ আৰু আঁঠু ঢাকি পোছাক পিন্ধিব লাগিব৷ এখন সংবাদ পত্ৰত প্ৰকাশিত প্ৰতিবেদন অনুযায়ী, দৰ্শকসকলক কোনো বিশেষ পোছাক পিন্ধিবলৈ কোৱা নাই কিন্তু খোলা-মেলা পোছাক কৰাত মানা আছে৷

কেৱল ষ্টেডিয়ামেই নহয়, কাটাৰৰ ভিন ভিন স্থানতো একে নিয়ম প্ৰযোজ্য হ’ব৷ কাটাৰ বিশ্বকাপৰ চীফ টেকন’ল’জী অফিচাৰ নিয়াচ আব্দুলৰহিমানে এই সম্পৰ্কত কয় যে ষ্টেডিয়ামত অত্যাধুনিক কেমেৰা ৰখা হ’ব৷ ইয়াৰ দ্বাৰা কোনে কি পোছাক পৰিধান কৰিছে, তাত নজৰ ৰখা হ’ব৷

ফিফাইও এইক্ষেত্ৰত মুখ খুলিছে৷ ফুটবল সংস্থাটোৱে কয় যে দৰ্শকৰ ইচ্ছআ অনুযায়ী পোছাক নিৰ্ভৰ কৰিছে৷ কিন্তু আয়োজক দেশৰ আইন যাতে সকলোৱে মানি চলে৷