ডিজিটেল ডেস্কঃ এটা বিশেষ এটিএম। এই এটিএমৰ পৰা পইচা নহয়, ওলাব ঘেঁহু, চাউল। শুনি আচৰিত লাগিছে নহয়নে? আচৰিত হোৱাটো স্বাভাৱিক। ওড়িশাত আৰম্ভ হ’বলৈ ওলাইছে এনে এক এটিএমৰ সুবিধা, য'ৰ পৰা ওলাব শস্য। ৰাজ্য চৰকাৰে শীঘ্ৰেই এই সুবিধাৰ অধীনত ৰেচন ডিপ'ত এটিএমৰ পৰা খাদ্যশস্য দিয়াৰ ব্যৱস্থা কৰিবলৈ ওলাইছে। ইয়াক গ্ৰেইন এটিএম (Grain ATM) নামেৰে অভিহিত কৰা হৈছে।
গ্ৰেইন এটিএমে কেনেকৈ কাম কৰিব?
ৰেচন কাৰ্ডধাৰীসকলে শস্যৰ এটিএমত নিজৰ আধাৰ কাৰ্ডৰ নম্বৰ আৰু ৰেচন কাৰ্ডত উল্লেখ কৰা নম্বৰটো দিব লাগিব। এনে কৰিলে গ্ৰাহকে ATM ৰ পৰা খাদ্য শস্য পাব। বৰ্তমান চৰকাৰে ইয়াক পাইলট প্ৰজেক্টৰ অধীনত আৰম্ভ কৰিছে। এই আঁচনিৰ অধীনত ভুৱনেশ্বৰত স্থাপন কৰিবলৈ গৈ আছে প্ৰথমটো শস্যৰ এটিএম।
সকলো জিলাতে উপলব্ধ হ’ব এই সুবিধা
খাদ্য যোগান আৰু গ্ৰাহক কল্যাণ মন্ত্ৰী অতনু সব্যসাচীয়ে মঙলবাৰে ওড়িশা বিধানসভাত এই আঁচনিৰ বিষয়ে তথ্য প্ৰদান কৰে। তেওঁ কয় যে ওড়িশাৰ অংশীদাৰসকলক গ্ৰেইন এটিএমৰ পৰা ৰেচন দিয়াৰ প্ৰস্তুতি চলি আছে। প্ৰাৰম্ভিক পৰ্যায়ত চহৰ অঞ্চলত স্থাপন কৰা হ’ব শস্যৰ এটিএম। ইয়াৰ পিছত সকলো জিলাতে এই বিশেষ এটিএম স্থাপনৰ পৰিকল্পনা কৰা হৈছে। লগতে পৰৱৰ্তী পৰ্যায়ত ৰাজ্যৰ সকলো জিলাতে শস্যৰ এটিএম স্থাপনৰ পৰিকল্পনা কৰা হৈছে।
বিশেষ ক’ড থকা কাৰ্ড এখনৰ প্ৰয়োজন হ’ব
মন্ত্ৰী অতনু সব্যসাচীয়ে জানিবলৈ দিয়ে যে, শস্যৰ এটিএমৰ পৰা ৰেচন ল’বলৈ অংশীদাৰসকলক বিশেষ ক’ড থকা এখন কাৰ্ড যোগান ধৰা হ’ব৷ গ্ৰেইন এটিএম মেচিন সম্পূৰ্ণ টাচ্চ স্ক্ৰীণ থাকিব। ইয়াত বায়’মেট্ৰিক সুবিধাও উপলব্ধ থাকিব।
গুৰুগ্ৰামত স্থাপন কৰা হৈছে প্ৰথম শস্যৰ এটিএম
আপোনালোকক জনাওঁ যে দেশৰ প্ৰথমটো শস্যৰ এটিএম হাৰিয়ানাৰ গুৰুগ্ৰামত স্থাপন কৰা হৈছে। এই মেচিনটো চৰকাৰে বিশ্ব খাদ্য কাৰ্যসূচীৰ অধীনত প্ৰচাৰ কৰি আছে। ইয়াক ‘স্বয়ংক্ৰিয়, বহু পণ্য, শস্য বিতৰণ যন্ত্ৰ’ বুলিও কোৱা হয়।
Continue Reading
