ডিজিটেল ডেস্কঃ ভাৰতৰ ইতিহাসত আৰু এই শতিকাৰ অন্যতম ভয়াৱহ ৰে’ল দুৰ্ঘটনাত এতিয়ালৈকে ২৮৮ জন লোকৰ মৃত্যু হৈছে। এই দুৰ্ঘটনাত শ শ লোক আহত হৈছে, যিসকল চিকিৎসালয়ত চিকিৎসাধীন হৈ আছে। শনিবাৰে (৩ জুন) স্থান পৰিদৰ্শন কৰি প্ৰধানমন্ত্ৰী মোদীয়ে চিকিৎসালয়ত ভুক্তভোগীক সাক্ষাৎ কৰে। ইয়াৰ মাজতে তেওঁ দুৰ্ঘটনাটোৰ বাবে দোষী সাব্যস্ত হোৱাসকলৰ বিৰুদ্ধে কঠোৰ ব্যৱস্থা গ্ৰহণৰ কথাও কয়। এই সকলোবোৰৰ মাজতে এটা প্ৰশ্ন সৰ্বাধিক সোধা হৈছে যে ইমান ডাঙৰ ৰেল দুৰ্ঘটনা কেনেকৈ হ’ল।
ওড়িশাত এই ৰেল দুৰ্ঘটনাৰ ২৪ ঘণ্টাৰো অধিক সময় পাৰ হৈ গ’ল। অৱশ্যে এই ভয়াবহ ট্ৰেজেডী কেনেকৈ সংঘটিত হ’ল সেয়া এতিয়াও স্পষ্ট হোৱা নাই। অতি কম তথ্যৰে ৰে’লৱেই এক চমু আনুষ্ঠানিক বিবৃতি প্ৰকাশ কৰে। ৰে’লৱে ব’ৰ্ডে জনোৱা মতে, আপ লাইনত কৰমণ্ডল এক্সপ্ৰেছ সম্পূৰ্ণ গতিৰে চলি থকাৰ বিপৰীতে বেংগালুৰু-হাওৰা য়েছৱন্তপুৰ এক্সপ্ৰেছ ডাউন লাইনত চলি আছিল। মাল ট্ৰেইনখন তেতিয়া কমন লুপত থিয় হৈ আছিল। ইয়াৰ পিছতে কৰমণ্ডল এক্সপ্ৰেছ ৰেলপথৰ পৰা ওলাই যায় আৰু ইয়াৰ কিছুমান ডবা মাল ট্ৰেইনৰ লগত খুন্দা মাৰে আৰু তাৰ পিছত কিছুমান ডবা য়েছৱন্তপুৰ এক্সপ্ৰেছৰ সৈতে সংঘৰ্ষত লিপ্ত হয়।
এই দুৰ্ঘটনাৰ প্ৰকৃত কাৰণ তদন্তৰ পিছতহে জানিব পৰা যাব, কিন্তু অনুমান কৰা হৈছে যে চিগনেল ফল্টৰ বাবে কৰমণ্ডল এক্সপ্ৰেছখনে নিৰ্ধাৰিত ট্ৰেকৰ পৰা বিচ্যুত হৈ পিছফালৰ পৰা মাল ৰে’লখনত খুন্দা মাৰে। অৱশ্যে ঘটনাৰ আনুষ্ঠানিক তদন্তৰ পিছতহে সম্পূৰ্ণ ছবি স্পষ্ট হোৱাৰ সম্ভাৱনা আছে।
Continue Reading
