ক্ৰিকেটাৰ পৃথ্বী শ্ব'ৰ বিৰুদ্ধে মহিলা ইউটিউবাৰে কৰা যৌন নিৰ্যাতনৰ দাবী ভুৱা আছিল :চিচিটিভিৰ ফুটেজৰ ভিত্তিত আদালতক জনালে মুম্বাই আৰক্ষীয়ে

 এজন আৰক্ষী বিষয়াই মুম্বাইৰ আন্ধেৰী দণ্ডাধীশ আদালতত কৈছে  যে ভাৰতীয় ক্ৰিকেটাৰ পৃথ্বী শ্ব'ৰ বিৰুদ্ধে ছ'চিয়েল মিডিয়া ইনফ্লুৱেন্সাৰ স্বপ্না গিলে কৰা  অভিযোগ মিছা আৰু ভিত্তিহীন আছিল। গিলে অভিযোগ কৰিছিল যে শ্ব'য়ে চলিত বৰ্ষৰ  বছৰৰ ১৫ ফেব্ৰুৱাৰীত এখন পাবত তেওঁক যৌন  উৎপীড়ন কৰিছিল। শ্ব'ৰ বিৰুদ্ধে কৰা অভিযোগৰ ভিত্তিত  কোনো এজাহাৰ পঞ্জীয়ন নোহোৱাৰ পিছত স্বপ্না গিলে মুম্বাই  আৰক্ষীৰ বিৰুদ্ধে আন্ধেৰী দণ্ডাধীশ আদালতৰ কাষ চাপিছিল। গিলে তেওঁৰ অধিবক্তা  আলী কাশিফ খানৰ জৰিয়তে আন্ধেৰী আদালতত এখন এজাহাৰ পঞ্জীয়ন কৰিবলৈ বিচাৰিছিল। 

দণ্ডাধীশে তেওঁৰ  অভিযোগ লাভ কৰাৰ পিছত আৰক্ষীক বিষয়টো সন্দৰ্ভত  প্ৰতিবেদন দাখিল কৰিবলৈ নিৰ্দেশ দিছিল। পুলিচে তদন্ত কৰি দাখিল কৰা  প্ৰতিবেদনখনত আদালতক অনুৰোধ কৰিছিল যে গিলৰ বন্ধুৱে তেওঁৰ ফোনত ৰেকৰ্ড কৰা ঘটনাৰ  ভিডিঅ' ফুটেজ উপস্থাপন কৰিবলৈ অনুমতি দিব লাগে। ভিডিঅ'টো সংবাদ মাধ্যমত ভাইৰেল হৈ পৰিছিল। আৰক্ষীয়ে  পাবৰ বাহিৰত সংঘটিত ঘটনাটোৰ চিচিটিভি ফুটেজো  বিচাৰিছিল। আদালতে আৰক্ষীক সমগ্ৰ ঘটনাটোৰ ফুটেজ সংগ্ৰহ কৰি দাখিল কৰিবলৈ কৈছিল আৰু বিষয়টোৰ শুনানি  ২৮ জুনলৈ স্থগিত ৰাখিছিল। গিলৰ অভিযোগৰ ভিত্তিত  আইপিচি ধাৰা ৩৫৪ (মহিলাৰ  শালীনতা হানি  কৰাৰ উদ্দেশ্যৰে আক্ৰমণ বা অপৰাধমূলক বল প্ৰয়োগ), ৫০৯ (এগৰাকী মহিলাৰ শালীনতাক অপমান কৰাৰ উদ্দেশ্যে কৰা আক্ৰমণ বা অপৰাধমূলক বলপ্ৰয়োগ) আৰু ৩২৪ (স্বেচ্ছাই অস্ত্ৰ-শস্ত্ৰৰ দ্বাৰা আঘাত  কৰা)ৰ অধীনত গোচৰ ৰুজু কৰিছিল।

শ্ব' আৰু তেওঁৰ বন্ধু আশীষ যাদৱৰ বিৰুদ্ধে গিলক  বেটেৰে আক্ৰমণ কৰাৰ অভিযোগ কৰা হৈছিল। আৰক্ষীয়ে আদালতক কৈছে যে পাবৰ চিচিটিভি ফুটেজে  দেখুৱায় যে গিল আৰু তেওঁৰ বন্ধু শোবিত ঠাকুৰে সুৰাপান কৰি নাচি আছিল। ঠাকুৰে শ্ব'ক তেওঁৰ ম'বাইল ফোনেৰে ভিডিঅ’  কৰিব বিচাৰিছিল, কিন্তু ক্ৰিকেটাৰজনে তেওঁক ভিডিঅ' লোৱাত  বাধা দিছিল। ফুটেজটোত  শ্ব' আৰু আনসকলে গিলক কোনো ধৰণে উৎপীড়ন কৰাৰ কোনো দৃশ্য নাই। আৰক্ষীয়ে লগতে কয় যে তেওঁলোকে পাবত উপস্থিত সাক্ষীসকলৰ জবানবন্দী লিপিবদ্ধ কৰিছে।  সাক্ষীসকলে কৈছিল যে কোনেও গিলক নিৰ্যাতন চলোৱা দেখা  নাছিল। আৰক্ষীয়ে জনোৱা অনুসৰি  তেওঁলোকে পাবৰ ওচৰে পাজৰে থকা এয়াৰ ট্ৰেফিক কণ্ট্ৰোল (এটিচি) টাৱাৰৰ চিচিটিভি ফুটেজো পৰীক্ষা কৰিছে  আৰু তাত  দেখা গৈছে যে গিলে  হাতত বেছবলৰ বেট লৈ শ্ব'ৰ গাড়ীখন অনুসৰণ কৰি আছিল। 

ফুটেজটোত দেখা গৈছে  যে গিলে  ক্ৰিকেটাৰজনৰ গাড়ীৰ  উইণ্ডশ্বিল্ড ভাঙি পেলাইছিল । প্ৰতিবেদনখনত এইটোও উল্লেখ কৰা হৈছে যে আৰক্ষীয়ে কেন্দ্ৰীয় ঔদ্যোগিক সুৰক্ষা বাহিনীৰ (চিআইএছএফ) বিষয়াসকলৰ বিবৃতি লিপিবদ্ধ কৰিছে আৰু তেওঁলোকেও কৈছিল যে গিলৰ দাবী অনুসৰি এনে কোনো ঘটনা সংঘটিত হোৱা নাছিল। চিচিটিভি ফুটেজৰ ভিত্তিত আৰক্ষীয়ে দিয়া প্ৰতিবেদনত এতিয়া মুখ বন্ধ হৈ পৰিছে মহিলা ইউটিউবাৰগৰাকীৰ।