‘কিংমেকাৰ’ চন্দ্ৰবাবু নাইডুকলৈ টনা-আজোৰা! কাৰ সৈতে থাকিব? জনালে নাইডুৱে

 এনে খবৰো ওলাইছে  যে তেওঁলোকে এন ডি এ এৰি ইণ্ডিয়া এলায়েন্সত যোগদান কৰিব। এনে পৰিস্থিতিত অৱশ্যে তেলেগু দেশম পাৰ্টিৰ মুৰব্বী  নাইডুৱে স্পষ্ট কৰি দিছে যে তেওঁ কেৱল এন ডি এৰ সৈতেই  আছে আৰু থাকিব।  উল্লেখ্য  নাইডুৰ টিডিপিয়ে অন্ধ্ৰপ্ৰদেশত ধুমুহাৰ সৃষ্টি কৰিছে। ৰাজ্য খনৰ  বিধানসভা নিৰ্বাচনত ১৭৫খন আসনৰ ভিতৰত ১৬৪খন আসনত জয়লাভ কৰিছে টিডিপি নেতৃত্বাধীন এনডিএই। আনহাতে লোকসভা নিৰ্বাচনত ২৫টা সমষ্টিৰ ভিতৰত ১৬খন আসন লাভ কৰিছে নাইডুৰ মিত্ৰজোঁটে। এনে পৰিস্থিতিত এন ডি এৰ বৈঠকত অংশগ্ৰহণ কৰিলৈ দিল্লীলৈ মাতি পঠিওৱা হৈছে  চন্দ্ৰবাবু নাইডু আৰু জনসেনা দলৰ মুৰব্বী কে পৱন কল্যাণক। 

ইয়াৰ পূৰ্বে প্ৰবীণ নেতাগৰাকীয়ে সংবাদমেলত কয়   যে, “মই এন ডি এৰ বৈঠকত অংশগ্ৰহণ কৰিবলৈ নতুন দিল্লীলৈ গৈ আছো। মই এন ডি এৰ লগতে আছো। পিছত বেলেগ কিবা সম্ভাৱনা থাকিলে জনাম।" অৱশ্যে বহুতে তেওঁৰ মন্তব্যত 'মধ্যম পন্থা' বিচাৰি পাইছে। অৰ্থাৎ এন ডি এৰ লগত থাকিলেও তেওঁ প্ৰয়োজনত  ইণ্ডিয়া মিত্ৰজোঁটৰ  কথাও ভাবিব পাৰে।আনহাতে  বহুতে ভাবে যে নীতিশ ‘দল বাগৰাত পাকৈত ’ হ’লেও চন্দ্ৰবাবুৱে এন ডি এ এৰি নাযায়। জানিব পৰা মতে  চন্দ্ৰবাবু নাইডুৱে  অন্ধ্ৰৰ মুখ্যমন্ত্ৰী হিচাবে ৯ জুনত শপতগ্ৰহণ কৰাৰ সম্ভাৱনা আছে। প্ৰধানমন্ত্ৰী নৰেন্দ্ৰ মোডী,  অমিত শ্বাহকে ধৰি বিজেপিৰ অন্যান্য শীৰ্ষ নেতাসকলক শপতগ্ৰহণ অনুষ্ঠানত অংশগ্ৰহণ কৰিবলৈ আমন্ত্ৰণ জনোৱা হৈছে বুলি বিশেষ সূত্ৰই প্ৰকাশ কৰিছে।