কিয় চাকৰিৰ পৰা বৰ্খাস্ত কৰা হ'ল আৰিয়ান খানৰ ড্ৰাগছ গোচৰৰ সৈতে জড়িত এনচিবিৰ বিষয়াক?

এক প্ৰতিবেদন অনুসৰি আৰিয়ান খানৰ সৈতে জড়িত ড্ৰাগছৰ গোচৰত বিশ্ব বিজয় সিঙৰ বিৰুদ্ধে এই ব্যৱস্থা গ্ৰহণ কৰা হোৱা নাই যদিও আন এটা গোচৰত তেওঁ কৰা অসৎ আচৰণৰ দোষী সাব্যস্ত কৰা হৈছে। এই গোচৰত যোৱা বছৰৰ এপ্ৰিল মাহতেই তেওঁক নিলম্বন কৰা হৈছিল। তেতিয়াৰ পৰাই তদন্ত চলি আছিল। পৰবৰ্তী সময়ত এই অসংলগ্ন গোচৰৰ তদন্ত সম্পূৰ্ণ হোৱাৰ পাছত তেওঁক সেৱাৰ পৰা বৰ্খাস্ত কৰা হৈছে। প্ৰতিবেদন অনুসৰি এনচিবিৰ ডিজি সত্য নাৰায়ণ প্ৰধানে এই কথা নিশ্চিত কৰিছে যদিও সম্প্ৰতি বিশ্ব বিজয় সিঙে এই বিষয়টো গৃহ মন্ত্ৰালয়ৰ ওচৰত বিচাৰাধীন বুলি কৈ কোনো মন্তব্য দিবলৈ অস্বীকাৰ কৰিছে।

২০২১ চনৰ ২ অক্টোবৰত এনচিবিৰ প্ৰাক্তন খণ্ড সঞ্চালক সমীৰ ৱানখেদেৰ নেতৃত্বত কাৰ্ডেলিয়া ক্ৰুজ জাহাজখনত অভিযান চলাইছিল। মুম্বাই বন্দৰৰ আন্তঃৰাষ্ট্ৰীয় ক্ৰুজ টাৰ্মিনেলত চলোৱা অভিযানত আৰিয়ান খানকে ধৰি বহু লোকক ড্ৰাগছ ৰখাৰ অভিযোগত গ্ৰেপ্তাৰ কৰা হয়। কিন্তু এই গোচৰত আৰিয়ান খানৰ বিৰুদ্ধে প্ৰমাণ সংগ্ৰহ কৰিব নোৱাৰিলে এনচিবিয়ে। ইয়াৰ পাছতো আৰিয়ানক প্ৰায় এমাহ জিম্মাত থাকিব লগা হৈছিল। ২০২১ চনৰ ২৮ অক্টোবৰত আৰিয়ান‌ খানক বম্বে উচ্চ ন্যায়ালয়ৰ পৰা জামিনত মুকলি কৰি দিয়া হয়। পাছত এনচিবিয়ে ২০২২ চনৰ মে’ মাহত চাৰ্জ শ্বীটতো আৰিয়ান খানক অভিযুক্ত নহয় বুলি উল্লেখ কৰে। ইয়াৰ পাছত এনচিবিয়ে ৱানখেদেকে ধৰি ৭জন বিষয়াৰ বিৰুদ্ধে সুকীয়া বিভাগীয় তদন্ত চলায়। এই তদন্ত ২০২১ চনৰ নৱেম্বৰ মাহত শেষ হৈছিল। এই তদন্তৰ প্ৰতিবেদন এতিয়াও ৰাজহুৱা হোৱা নাই।