ডিজিটেল ডেস্কঃ বালাচৰত ৰে'ল দুৰ্ঘটনাত ২৮৮ গৰাকী লোক নিহত হৈছে। আজি পুনৰ সেই পৰিসংখ্যা সংশোধন কৰিলে ওড়িশা চৰকাৰে। আজি দিনৰ ভাগত চৰকাৰে মৃতকৰ সংখ্যা ২৭৮ বুলি প্ৰকাশ কৰিছিল যদিও নিশাৰ ভাগত সেই সংখ্যা ২৮৮ বুলি সংশোধন কৰে।
ওড়িশাৰ মুখ্য সচিব প্ৰদীপ কুমাৰ জেনাই কয় যে নতুন পৰিসংখ্যাবোৰ মৃতদেহৰ প্ৰমাণীকৰণ, চিকিৎসালয়ত কেইবাজনো আহতৰ মৃত্যু আৰু জিলা সংগ্ৰাহকৰ পৰা প্ৰাপ্ত তথ্যৰ ওপৰত আধাৰিত। ৰে'লৱেই দেওবাৰেই কৈছিল যে শুক্ৰবাৰে সংঘটিত দুৰ্ঘটনাত ২৮৮ জন লোক নিহত হৈছিল। কিন্তু ওড়িশা চৰকাৰে দেওবাৰে কৈছিল যে দুৰ্ঘটনাটোত ২৭৫ জন লোকৰহে মৃত্যু হৈছিল। দুদিন পিছত ৰাজ্য চৰকাৰে মৃতকৰ পৰিসংখ্যা পৰ্যালোচনা কৰে আৰু ৰে'লৱেৰ মতৰ সৈতে সহমত হয়।
কৰমণ্ডল এক্সপ্ৰেছ দুৰ্ঘটনাত আহত তিনি জন লোকৰ আজি মৃত্যু ঘটে। এতিয়াও চিনাক্তকৰণ নোহোৱাকৈ পৰি ৰৈছে ১০১ টা মৃতদেহ। ভুৱনেশ্বৰৰ মৰ্গত ৰখা বহু কেইটা মৃতদেহ কোনো লোকেই চিনাক্ত কৰিবলৈ সক্ষম হোৱা নাই।
শুকুৰবাৰে কৰমণ্ডল এক্সপ্ৰেছ দুৰ্ঘটনাত ২৭৫ গৰাকী যাত্ৰী নিহত হোৱা বুলি প্ৰথমে চৰকাৰীভাবে প্ৰকাশ কৰা হৈছিল। এতিয়া সেই সংখ্যা বৃদ্ধি পাই ২৮৮ গৰাকী হৈছে। ইষ্টাৰ্ণ ৰে'লৱেৰ বিভাগীয় ৰে'ল ৱে মেনেজাৰ ৰিঙ্কেশ ৰয়ে কয়, "দুৰ্ঘটনাটোত ১,১০০ জন লোক আহত হৈছে। তাৰে ভিতৰত ৯০০ লোকক চিকিৎসালয়ৰ পৰা অব্যাহতি দিয়া হৈছে।’’
Continue Reading
