ডিজিটেল ডেস্কঃ কেৱল মোদী আৰু হিন্দুত্বই যথেষ্ট নহয়! বিজেপিৰ প্ৰতি এইদৰে সকিয়নী প্ৰেৰণ কৰিলে খোদ আৰএছএছ-এ। আৰএছএছৰ ইংৰাজী মাউথপিছ ‘অৰ্গেনাইজাৰ’ৰে এই সতৰ্ক বাণী কৰিছে।
কিছুদিন পূৰ্বে ‘অৰ্গেনাইজাৰ’ত প্ৰকাশিত সম্পাদকীয় এটাই স্পষ্ট কৰি দিছে যে কেৱল মোদীৰ জনপ্ৰিয়তা বা হিন্দুত্বই বিজেপিক শক্তিশালী কৰিব নোৱাৰে। বিজেপিয়ে যদি জয়ী হ’ব বিচাৰে তেন্তে দেশত শক্তিশালী নেতৃত্ব গঢ়ি তোলাৰ প্ৰয়োজন।
‘অৰ্গেনাইজাৰ’ৰ সম্পাদকীয় স্তম্ভত কোৱা হৈছে যে কেৱল মোদীৰ ভাবমূর্তি আৰু হিন্দুত্ববাদী ৰাজনীতিৰে নির্বাচনত জয়ী হ’বলৈ যথেষ্ট নহয়৷ আঞ্চলিক পৰ্যায়ত দক্ষ নেতৃত্ব গঢ়ি তোলাৰ প্ৰয়োজন। সেই সম্পাদকীয়ত লগতে কোৱা হৈছে যে এইটোৱেই বিজেপিৰ জ্ঞানলৈ অহাৰ উপযুক্ত সময়।
উল্লেখ্য যে শেহতীয়াকৈ বিভিন্ন সমীক্ষা সংস্থাৰ মতে, দেশৰ জনপ্ৰিয় নেতাৰ শীৰ্ষত থাকিলেও এতিয়া বিজেপিৰ জয়ৰ বাবে কেৱল নৰেন্দ্ৰ মোদীৰ মুখখনেই এতিয়া যথেষ্ট নহয়। বিগত কেইটামান নিৰ্বাচনত, বিশেষকৈ পশ্চিমবংগ, হিমাচল প্ৰদেশ আৰু কৰ্ণাটকত মোদীৰ ইমেজ আৰু যাদু দুয়োটাই বেয়াকৈ মুখথেকেচা খাইছে।
আৰএছএছ-এ এই তিনিটা নিৰ্বাচনত বিজেপিয়ে পৰাস্ত হোৱাৰ পাছত গেৰুৱা শিবিৰৰ বাবে আগন্তুক পথ যে পূৰ্বৰ দৰে সহজ হৈ থকা নাই সেয়া স্বীকাৰ কৰি লৈছে।
Continue Reading
