ডিজিটেল ডেস্কঃ মণিপুৰত হিংসাত্মক ঘটনা সংঘটিত হোৱাৰ তিনিমাহ পাছতো এতিয়ালৈকে হিংসাত্মক পৰিস্থিতি বন্ধ হোৱা নাই৷ এই হিংসাত ১৬০ জন লোকে প্ৰাণ হেৰুৱাৰ লগতে হাজাৰ হাজাৰ লোক গৃহহীন হৈ পৰিছে। যিসকল লোকে শিবিৰত থাকি জীৱন কটাবলগীয়া গৈছে। মণিপুৰৰ হিংসাত্মক পৰিস্থিতিয়ে মণিপুৰৰ অৰ্থনীতিতো প্ৰভাৱ পেলাইছে। ইয়াৰ ফলত বিত্ত মন্ত্ৰালয়ে প্ৰকাশ কৰা ২০২৩ চনৰ জুলাই মাহৰ জি এছ টি সংগ্ৰহৰ পৰিসংখ্যা অনুসৰি মণিপুৰ একমাত্ৰ ৰাজ্য য’ত জি এছ টি সংগ্ৰহ হ্ৰাস পাইছে।
যি ৰাজ্যভিত্তিক জি এছ টি সংগ্ৰহৰ তথ্য প্ৰকাশ পাইছে সেই অনুসৰি মণিপুৰৰ বাহিৰে সকলো ৰাজ্যতে জি এছ টি সংগ্ৰহৰ বৃদ্ধি পাইছে৷কিন্তু ২০২৩ চনৰ জুলাই মাহত মণিপুৰত জি এছ টি সংগ্ৰহ ৪২ কোটি টকালৈ নামি আহিছে, যিটো ২০২২ চনৰ জুলাইৰ তুলনাত ৭% কম। গতিকে ইয়াৰ পূৰ্বৰ জুন মাহৰ ২০২৩ চনৰ তুলনাত জি এছ টি সংগ্ৰহৰ ৩০.৬১ শতাংশ হ্ৰাস পাইছে। ২০২৩ চনৰ জুন মাহত মণিপুৰৰ জি এছ টি সংগ্ৰহ আছিল ৬০.৩৭ কোটি টকা।
মণিপুৰৰ হিংসাৰ বাবে ৰাজ্যৰ অৰ্থনীতিত ইয়াৰ বেয়া প্ৰভাৱ দেখা গৈছে। মেইটেই আৰু কুকি জনগোষ্ঠীৰ মাজত হোৱা হিংসাৰ বাবে মণিপুৰৰ পৰা ৰপ্তানি ৮০ শতাংশ পৰ্যন্ত হ্ৰাস পাইছে। হস্তনিৰ্মিত কাপোৰ, ঔষধি উদ্ভিদ আৰু বহুতো খাদ্য সামগ্ৰী ৰাজ্যৰ পৰা ৰপ্তানি কৰা হয়। মণিপুৰ মইৰাংফি, লীৰাম, লাছিংফি, ফানেক আদি কাপোৰৰ বাবে পৰিচিত আৰু এই কাপোৰৰ আমেৰিকা, ইউৰোপ আৰু ছিংগাপুৰত ভাল চাহিদা আছে। কিন্তু ৰাজ্যত হিংসাত্মক ঘটনা বিয়পি পৰাৰ পাছত তাত ইণ্টাৰনেট বন্ধ হৈ আছে, ইয়াৰ ফলত তাত অর্থনীতিতো প্রভাৱ পৰিছে৷ বেংকৰ পৰা এটিএমলৈকে সকলো তাত বন্ধ।
মৰে সীমান্ত বিন্দু যাৰ মাজেৰে ভাৰত-ম্যানমাৰৰ লগতে দক্ষিণ-পূব এছিয়াৰ অন্যান্য দেশৰ সৈতে পথেৰে বাণিজ্যিক পথ বন্ধ হৈ আছে, যাৰ ফলত মণিপুৰৰ অৰ্থনীতিত প্ৰভাৱ পৰিছে। শিপিনীৰ সংখ্যাৰ ফালৰ পৰা দেশৰ ভিতৰতে দ্বিতীয় বৃহত্তম ৰাজ্য আৰু তাঁতশালৰ সংখ্যাৰ ক্ষেত্ৰত দেশৰ ভিতৰতে চতুৰ্থ স্থানত আছে মণিপুৰ। মেইটেই আৰু কুকি সম্প্ৰদায়ৰ মাজত অনাস্থাৰ ব্যৱধান ইমানেই বৃদ্ধি পাইছে যে ৰাজ্যখনৰ অৰ্থনীতি কেতিয়ালৈকে পুনৰ শুদ্ধ পথত আহিব, সেয়া এক ডাঙৰ প্ৰশ্ন হৈয়েই আছে।
Continue Reading
