কৰ’নাই কাঢ়িছে মাতৃৰ মমতা! কোলাত নহয় গাড়ীৰ ডিকীত আৱদ্ধ এটি শিশু…

ৱাশ্বিংটনঃ কৰ’নাৰ বিভীষিকাই বিধ্বস্ত কৰি তুলিছে সাধাৰণ জনজীৱন। কৰ’না নামৰ ভাইৰাছৰ বাবেই নানা নাভুত-নাশ্ৰূত ঘটনাৰ সাক্ষী হ’ব লগীয়া হৈছে আমাৰ সমাজে। কেতবোৰ কথাই চকু কপাল তুলিছে সচেতন মহলৰ। শেহতীয়াকৈ পোহৰলৈ অহা এটি হৃদয়বিদাৰক ঘটনাই বাতৰিৰ শিৰোনাম দখল কৰা দেখিবলৈ পোৱা গৈছে। আমেৰিকা যুক্তৰাষ্ট্ৰৰ টেক্সাছত এখন গাড়ীৰ ডিকীত কৰ’না আক্ৰান্ত নিজ সন্তানক ভৰাই ৰখাৰ খবৰ আহিছে। নিজ সন্তানক এইদৰে গাড়ীৰ ডিকীত ভৰাই ৰখাৰ অপৰাধত শিশুটিৰ মাতৃক গ্ৰেপ্তাৰো কৰিছে আৰক্ষীয়ে । গ্ৰেপ্তাৰ কৰা শিক্ষয়ত্ৰীগৰাকীৰ নাম ছাৰাহ বিয়াম। জানিবলৈ পোৱা মতে, মহিলাগৰাকীৰ বয়স ৪১। পুত্ৰৰ দেহৰ পৰা কৰ’না সংক্ৰমিত হ’ব পাৰে বুলি ভাবিয়েই ছাৰাহ বিয়ামে গাড়ীৰ পিছফালে নিজ সন্তানক ডিকীত ভৰাই কৰ’না পৰীক্ষা কৰিবলৈ গৈছিল।

মন কৰিবলগীয়া যে, ৩ জানুৱাৰীত টেক্সাছৰ হাৰিছ পল্লীত এখন গাড়ীৰ পিছফালৰ পৰা শব্দ পোৱাৰ পাছত এজন ব্যক্তিয়ে জৰুৰীকালীন সেৱালৈ ফোন কৰি বিষয়টো সন্দৰ্ভত আৰক্ষীক অৱগত কৰে। আৰক্ষীয়ে খবৰ পোৱাৰ পাছতে শিশুটিক গাড়ীৰ ডিকীৰ পৰা উদ্ধাৰ কৰে আৰু শিশুটিৰ মাতৃ ছাৰাহ বিয়ামক গ্ৰেপ্তাৰ কৰে। তেওঁৰ পুত্ৰ কৰ’নাত আক্ৰান্ত হৈছিল আৰু সেইবাবে পুত্ৰক গাড়ীৰ ডিকীত ভৰাই থৈ কৰ’না পৰীক্ষা কৰিবলৈ গৈছিল বুলি আৰক্ষীৰ জেৰাত স্বীকাৰ কৰিছে শিক্ষয়ত্ৰীগৰাকীয়ে। জানিবলৈ পোৱা মতে, তেওঁ ২০১১ চনৰ পৰা এখন স্থানীয় উচ্চ মাধ্যমিক বিদ্যালয়ত অধ্যাপনা কৰি আছে। ঘটনাটোৰ পাছত, তেওঁক বিদ্যালয়ৰ পৰা বাধ্যতামূলক ছুটিত প্ৰেৰণ কৰা হৈছে।