ডিজিটেল ডেস্কঃ বিত্তীয় সংকটে জুৰুলা কৰা শ্ৰীলংকাথ এতিয়া কণীৰ তীব্ৰ নাটনিয়ে দেখা দিছে। অৰ্থনৈতিক বিপৰ্যয়ৰ পিছৰে পৰা শ্ৰীলংকাত কণীৰ উৎপাদন চাহিদাতকৈ বহু কম হৈ আছে। এনে পৰিস্থিতিত শ্ৰীলংকাই ভাৰতৰ পৰা কণী বিচাৰি আবেদন জনাইছে। ৰনিল বিক্ৰমসিংহৰ দেশখনে ভাৰতৰ পাঁচখন কুকুৰা ফাৰ্মৰ পৰা প্ৰতিদিনে দহ লাখটাকৈ কণী আমদানি কৰিবলৈ সিদ্ধান্ত লৈছে। দ্বীপ ৰাষ্ট্ৰখনৰ সৰ্ববৃহৎ বাণিজ্য সংস্থা শ্ৰীলংকা ষ্টেট ট্ৰেডিং কৰ্পোৰেচন (এছটিচি)ৰ অধ্যক্ষই এই কথা প্ৰকাশ কৰিছে।
এছটিচিৰ অধ্যক্ষ আচিৰি ভালিসুন্দৰাই কয় যে পূৰ্বে ভাৰতৰ দুখন ফাৰ্মৰ পৰা এবাৰত ২০ লাখটাকৈ কণী আমদানি কৰিছিল। এতিয়া প্ৰতিদিনে ১০ লাখটাকৈ কণী ভাৰতৰ পৰা আমদানি কৰা হ’ব। শ্ৰীলংকাৰ পশু উৎপাদন বিভাগে ভাৰতৰ পৰা কণী আমদানিৰ বিষয়টোত অনুমোদন জনাইছে। অলপতে শ্ৰীলংকাৰ ষ্টেট ট্ৰেডিং কৰ্পোৰেচন আৰু পশু উৎপাদন বিভাগৰ বিষয়াসকল ভাৰতলৈ আহিছিল আৰু কণী সংগ্ৰহ কৰিব পৰা ফাৰ্মৰ বিষয়ে জৰীপ কৰিছিল। ইয়াৰ পিছতে কণীৰ যোগান ধৰিবলৈ শ্ৰীলংকাই ভাৰতৰ মুঠ পাঁচখন কুকুৰা ফাৰ্ম চিনাক্ত কৰিছে।
ভালিসুন্দৰাৰ মতে শ্ৰীলংকাৰ বেকাৰী, বিস্কুট কোম্পানী, ৰেষ্টুৰেণ্ট আৰু কেটাৰিং কোম্পানীসমূহত কণীৰ প্ৰচুৰ চাহিদা আছে। লগতেঘৰুৱা ব্যৱহাৰৰ বাবেও সাধাৰণ লোকৰ মাজত কণীৰ যথেষ্ট চাহিদা আছে। সকলো চাহিদা পূৰণ কৰিবলৈ ভাৰতৰ পৰা প্ৰতিদিনে ১০ লাখটাকৈ কণী আমদানি কৰাৰ সিদ্ধান্ত লোৱা হৈছে।
Continue Reading
