ডিজিটেল ডেস্কঃ চণ্ডীগড় বিমানবন্দৰত কংগনা ৰাণাৱটক চৰিয়াই চাকৰি গ’ল চিআইএছএফৰ মহিলা কনিষ্টবল কুলৱিন্দৰ কৌৰৰ। কেৱল সেয়াই নহয়, শুকুৰবাৰে তেওঁক গ্ৰেপ্তাৰো কৰা হয়। কিন্তু গ্ৰেপ্তাৰৰ সময়তে কুলৱিন্দৰে কয় যে ১০০০ বাৰ চাকৰি গ’লেও তেওঁ মাতৃৰ সন্মান লাঘৱ হ’বলৈ নিদিয়ে। ইপিনে কুলৱিন্দৰৰ পক্ষত থিয় দিছে জনপ্ৰিয় সংগীত পৰিচালক তথা গায়ক বিশাল দাদলানীয়ে । দাদলানীয়ে কুলৱিন্দৰক চাকৰিৰ প্ৰস্তাৱ দিছে। বিশাল দাদলানীয়ে মহিলা জোৱানগৰাকীক চাকৰিৰ প্ৰস্তাৱ দি নিজৰ ইনষ্টাগ্ৰাম ষ্ট’ৰীজত এই বিষয়ত এটা পোষ্ট কৰিছে।
তেওঁ কয় যে তেওঁ হিংসাক প্ৰশ্ৰয় নিদিয়াৰ পিছতো কৌৰৰ এই কাৰ্য্যৰ বিষয়ে তেওঁ সহমত প্ৰকাশ কৰে।দাদলানীয়ে উল্লেখ কৰে , "মই কেতিয়াও হিংসাক সমৰ্থন নকৰো, কিন্তু এই চিআইএছএফ কৰ্মীগৰাকীৰ ক্ষোভৰ প্ৰয়োজনীয়তা মই উপলব্ধি কৰিব পাৰিছো। যদি তেওঁৰ বিৰুদ্ধে চিআইএছএফে কোনো ব্যৱস্থা গ্ৰহণ কৰে, তেন্তে মই তেওঁক চাকৰি দিম।" দাদলানীৰ এনে ঘোষণাই ছ’চিয়েল মিডিয়াত যথেষ্ট চৰ্চা আৰু বিভিন্ন প্ৰতিক্ৰিয়াৰ সৃষ্টি কৰিছে।বহুতে দাদলানীক সমৰ্থন কৰিছে। ইপিনে কৃষক কন্যাগৰাকীক গ্ৰেপ্তাৰ কৰাৰ বিৰুদ্ধে কৃষক সংগঠনসমূহে ৯ জুনৰ পৰা ব্যাপক প্ৰতিবাদী আন্দোলন গঢ়ি তুলিব বুলি ঘোষণা কৰিছে। উল্লেখ্য কৃষক আন্দোলন আৰু কৃষকৰ বিৰুদ্ধে কটু মন্তব্য কৰাৰ বাবেই কুলৱিন্দৰ কৌৰে কংগনা ৰাণাৱটক চণ্ডীগড়ৰ বিমান বন্দৰত বৃহস্পতিবাৰে চৰিয়াইছিল। ইয়াৰ পিছতে তেওঁক চাকৰিৰ পৰা নিলম্বন কৰা হৈছিল।
Continue Reading
