কোহলীৰ দূৰ্দান্ত প্ৰদৰ্শনে আৱেগিক কৰি তুলিলে অনুষ্কা শৰ্মাক, ইনষ্টাগ্ৰামত দিলে দীঘলিয়া প’ষ্ট

ডিজিটেল ডেস্কঃ সৰ্বত্ৰে এতিয়া কোহলী বন্দনা। পাকিস্তানৰ বিৰুদ্ধে জয়ৰ নায়ক বিৰাট কোহলীৰ বাবে আৱেগিক হৈ পৰিল তেওঁৰ পত্নী তথা অভিনেত্ৰী অনুষ্কা শৰ্মাই।

ইনষ্টাগ্ৰামত টিভিৰ পৰ্দাত কোহলীয়ে বিজয়োল্লাস কৰি থকাৰ এখনি ফটো প’ষ্ট কৰি অনুষ্কাই এটা দীঘল কেপচন লিখিছে। অনুষ্কাই লিখে যে দিৱালীৰ প্ৰাকক্ষণত কোহলীয়ে দেশবাসীলৈ ব্যাপক আনন্দ কঢ়িয়াই আনিলে।

“মই এইমাত্ৰ মোৰ জীৱনৰ আটাইতকৈ শ্ৰেষ্ঠ খেলখন উপভোগ কৰিলো।”- অনুষ্কাই লিখে। এইক্ষেত্ৰত তেওঁ শেহতীয়াকৈ কোহলীয়ে কেৰিয়াৰৰ সংকটৰ সন্মুখীন হোৱা দিনবোৰো মনত পেলায়।

অনুষ্কাই কয় যে কেৰিয়াৰৰ বেয়া দিনবোৰ পাৰ কৰি কোহলী এতিয়া অধিক শক্তিশালী আৰু পুৰঠ হৈ পৰিছে। এইক্ষেত্ৰত তেওঁ কোহলীৰ উৎসাহ-মনোবল-আত্মবিশ্বাসক প্ৰশংসা কৰে।

উল্লেখ্য যে আজি পাকিস্তানৰ বিৰুদ্ধে ভাৰতে টি২০ বিশ্বকাপৰ সফল আৰম্ভণি ঘটায়। কোহলীৰ ৫৩ টা বলত ৮২ ৰাণৰ জৰিয়তে ভাৰতে পাকিস্তানে বান্ধি দিয়া ১৬০ ৰাণৰ লক্ষ্য অতিক্ৰম কৰে।