ডিজিটেল ডেস্কঃ বলীউডৰ শ্বাহেনশ্বাহ অমিতাভ বচ্চনৰ অনুষ্ঠান ‘কৌন বনেগা কোৰড়পতি’ কিমান জনপ্ৰিয় সেই কথা সকলোৱে জানে। সৰু পৰ্দাত এই ৰিয়েলিটি শ্ব’টো অতি জনপ্ৰিয়। শেহতীয়াকৈ এই অনুষ্ঠানৰ ১৪ নং ছিজনৰ প্ৰতিও দৰ্শকৰ উৎসাহ স্পষ্ট ৰূপত দেখা গৈছে। অমিতাভৰ এই অনুষ্ঠানটোক কেন্দ্ৰ কৰি সৃষ্টি হোৱা উত্তেজনাৰ অন্ত নাই।
‘কেবিচি’ৰ হট ছীটত বহি প্ৰতিযোগীসকলৰ সৈতে আড্ডা মাৰি থকা দেখা যায় বিগ বিক। অমিতাভে নিজৰ জীৱনৰ বহু অজ্ঞাত তথ্যও ইয়াত প্ৰকাশ কৰে। শেহতীয়াকৈ ‘কেবিচি’ৰ হট ছীটত বহি আছিল মুম্বাইৰ সমীত শৰ্মা। অমিতাভে তেওঁৰ সৈতে হোৱা বাৰ্তালাপত কয়, তেওঁ কেনেকৈ ছ’চিয়েল মিডিয়া ব্যৱহাৰ কৰিবলৈ আৰম্ভ কৰিলে। আনকি ট্ৰ’ল হোৱাৰ ভয়ত তেওঁ নিজৰ পোষ্টবোৰৰ প্ৰতি কিমান সাৱধান সেই কথাও কয়।
প্ৰতিযোগীগৰাকীৰ সৈতে আড্ডা মাৰি থকাৰ সময়ত অমিতাভে এটা আমোদজনক ঘটনা স্মৰণ কৰে। অমিতাভ বচ্চনে কৈছিল- ''ভাৰত ভ্ৰমণত আহিছিল জাপানৰ প্ৰধানমন্ত্ৰী। জাপানৰ প্ৰধানমন্ত্ৰী আগমনৰ উপলক্ষে খোৱা-বোৱাৰ বিশাল আয়োজন কৰা হৈছিল। খোৱাৰ পাছত আহিল এটা ডাঙৰ বাটিত গোলাপৰ পাহি থকা হাত ধোৱা বাটিটো। অতিথিয়ে ভাবিলে যে এয়া খাদ্যৰ ডিশ্ব। সেয়েহে তেওঁ সেয়া পান কৰিলে। যাতে অতিথিজনে লাজ অনুভৱ নকৰে বা বিব্ৰতবোধ নকৰে তাৰ বাবে আমাৰ প্ৰধানমন্ত্ৰী নৰেন্দ্ৰ মোদীয়েও ইয়াক পান কৰে।''
অমিতাভ বচ্চনৰ মুখেৰে দেশৰ প্ৰধানমন্ত্ৰী নৰেন্দ্ৰ মোদীৰ এই আমোদজনক ঘটনা শুনিবলৈ পায় দৰ্শকসকল সুখী হৈ পৰে। উল্লেখ্য যে অমিতাভ বচ্চনে ২০০০ চনৰ পৰা কেবিচিৰ আয়োজন কৰি আহিছে। ইফালে তৃতীয় ছিজনৰ পৰিচালনাৰ দায়িত্বত আছিল শ্বাহৰুখ খান। কেবিচিৰ চতুৰ্দশ ছিজন ৭ আগষ্টৰ পৰা চনী চেনেলত সম্প্ৰচাৰ আৰম্ভ হৈছে।
Continue Reading
