গৌৰৱান্বিত ভাৰত! বিশ্বৰ ভিতৰতে ভাৰতত আছে সৰ্বাধিক মহিলা পাইলট

খেলপথাৰৰ পৰা ৰাজনৈতিক মঞ্চলৈ, বা উদ্যোগৰ পৰা আকাশত বিমান উৰুৱালৈকে ভাৰতীয় নাৰী ক’তো পিছ পৰি থকা নাই। সময় সলনি হৈছে, সলনি হৈছে মানুহৰ মানসিকতা। আজি ভাৰতীয় নাৰী সকলোতে আছে। সম্প্ৰতি ভাৰতীয় মহিলা পাইলট সকলে সমগ্ৰ বিশ্বক দিশ নিৰ্দেশনা দেখুৱাইছে। সমগ্ৰ বিশ্বৰ তুলনাত ভাৰতত মহিলা পাইলটৰ সংখ্যা বহু বেছি। ২০১৫ চনত উপলব্ধ তথ্য অনুসৰি বিশ্বত ১ লাখ ৩০ হাজাৰ পাইলট আছিল, ইয়াৰে মাত্ৰ ৪ হাজাৰ মহিলা পাইলট আছিল।অৰ্থাৎ মাত্ৰ প্ৰায় ৩ শতাংশ। কিন্তু ভাৰতৰ পৰিসংখ্যাই অন্য কথা দেখুৱাইছে। ২০১৫ চনলৈ ভাৰতত ৫০০০ পাইলটৰ ভিতৰত ৬০০গৰাকী মহিলা পাইলট। অৰ্থাৎ দেশৰ প্ৰায় ১২ শতাংশ মহিলা পাইলট, এই সংখ্যা আজি আৰু অধিক বৃদ্ধি পাইছে।

 কেন্দ্ৰীয় অসামৰিক বিমান পৰিবহণ মন্ত্ৰী জ্যোতিৰাদিত্য সিন্ধিয়াই লোকসভাত এক ভাষণৰ সময়ত কৈছিল যে দেশৰ মুঠ পাইলট শক্তিৰ ১৫ শতাংশই মহিলা। সিন্ধিয়াই কয়, ‘পৃথিৱীৰ আন সকলো দেশতে মাত্ৰ ৫ শতাংশ পাইলট মহিলা। ভাৰতত ১৫ শতাংশতকৈ অধিক পাইলট মহিলা যিটো মহিলা সবলীকৰণৰ চিন। যোৱা ২০-২৫ বছৰত বিমান উদ্যোগৰ বহু পৰিৱৰ্তন হৈছে।' অৰ্থাৎ আমেৰিকা আৰু ইউৰোপকে ধৰি বিশ্বৰ আন যিকোনো প্ৰগতিশীল দেশৰ তুলনাত ভাৰতত মহিলা পাইলটৰ সংখ্যা সৰ্বাধিক। ইণ্টাৰনেশ্যনেল ছ’চাইটি অৱ উইমেন এয়াৰলাইন পাইলট ২০২০ৰ তথ্য অনুসৰি আন সকলো দেশতে ভাৰতৰ শীৰ্ষত আছে। ৯.৯ শতাংশ মহিলা পাইলটৰ সৈতে দ্বিতীয় স্থানত আছে আয়াৰলেণ্ড। দক্ষিণ আফ্ৰিকাত ৯.৮ শতাংশ মহিলা পাইলটৰ সৈতে তৃতীয় আৰু কানাডাত ৬.৯ শতাংশই চতুৰ্থ স্থানত আছে।আনহাতে আমেৰিকা আৰু ইংলেণ্ডৰ দৰে দেশত ক্ৰমে মাত্ৰ ৫.৪ আৰু ৪.৭ শতাংশ মহিলা বিমান বিষয়া আছে।

১৯৮৮ চনত আন্তঃৰাষ্ট্ৰীয় বিমান যাত্ৰা কৰা দেশৰ প্ৰথমগৰাকী মহিলা পাইলট হাৰপ্ৰীত। তেওঁৰ মতে সমাজখন পূৰ্বতকৈ বহু বেছি প্ৰগতিশীল। অভিভাৱক, পৰিয়ালে বহুত সহায় কৰিছে। ফলত মহিলা পাইলটৰ সংখ্যা বৃদ্ধি পাইছে। আজি অসামৰিক বিমান পৰিবহণ উদ্যোগ ভাৰতীয় অৰ্থনীতিৰ এক মূল উপাদান হৈ পৰিছে। এই সন্দৰ্ভত সিন্ধিয়াই কয় যে চৰকাৰে ৩৩টা ঘৰুৱা কাৰ্গো টাৰ্মিনেল, পাইলটৰ বাবে ১৫ খন নতুন বিমান প্ৰশিক্ষণ বিদ্যালয় সৃষ্টি কৰাৰ উপৰিও চাকৰি আৰু ড্ৰ’ন খণ্ডত গুৰুত্ব দিব। বৰ্তমান কেন্দ্ৰীয় চৰকাৰে ২০২৫ চনৰ ভিতৰত ২২০টা নতুন বিমানবন্দৰ নিৰ্মাণৰ লক্ষ্য ৰাখিছে।